Deputetja demokrate, Albana Vokshi, gjatë fjalës së saj në Konferencën e Komisioneve Parlamentare për Çështjet e Bashkimit Europian (COSAC) të mbajtur në Kopehagen, theksoi se Shqipëria mund ta forcojë procesin e zgjerimin në BE vetëm përmes standardeve evropiane, jo atyre të dyfishta.
Vokshi nënvizoi se Danimarka konsiderohet modeli ideal i vendeve të pakorruptuara, ndërsa aspirata e Shqipërisë duhet të jetë sipas saj pikërisht “rruga drejt Danimarkës”, duke luftuar korrupsionin dhe duke ndërtuar institucione të besueshme.
Sipas saj, progresi nuk mund të jetë real në vende ku mungojnë zgjedhjet e lira, ku korrupsioni është endemik, gjyqësori i politizuar, parlamenti jofunksional dhe pushteti i përqendruar në një dorë, referuar vendit tonë.
“Vetëm duke garantuar drejtësi të vërtetë, zgjedhje konkurruese, institucione funksionale dhe respektim të të drejtave themelore, një vend mund të bëhet një kontributor i vërtetë në BE,” u shpreh Vokshi ndër të tjera.
Fjala e plotë e Vokshit
Faleminderit zonja Kryetare,
Sot jam shumë e kënaqur që flas, si pjesë e delegacionit shqiptar, mbi aspiratën tonë për t’u bërë një vend si Danimarka. Në ekonominë politike, Danimarka përshkruhet si shteti ideal i mungesës së korrupsionit, dhe përpjekjet për të çrrënjosur korrupsionin përshkruhen metaforikisht si ‘rruga drejt Danimarkës, për t’u bërë si Danimarka’.
Ardhur nga Shqipëria, besoj se Evropa nuk do të jetë e plotë dhe e sigurt pa Ballkanin Perëndimor. Por vendet e Ballkanit Perëndimor mund ta forcojnë BE-në dhe ta bëjnë atë më të sigurt vetëm nëse qeverisen nga ligji dhe nga standardet demokratike.
Jam e bindur se procesi i zgjerimit duhet të ndjekë një standard të vetëm për të gjithë, dhe jo standarde të dyfishta. Vullneti politik dhe konsideratat gjeopolitike nuk mjaftojnë. Një vend:
që nuk ka zgjedhje të lira dhe të ndershme,
që ka korrupsion endemik,
që ka gjyqësor të kompromentuar dhe të politizuar,
ku parlamenti është jofunksional dhe mungojnë mekanizmat e kontrollit dhe balancës,
ku pushteti është i përqendruar në një dorë,
e ka të vështirë të bëjë përparim real e të vërtetë.
Ndaj, ju bëj thirrje për vijimin e mbështetjes tuaj për reforma që garantojnë sundimin e ligjit, pavarësinë e drejtësisë, lirinë e medias dhe integritetin zgjedhor, në përputhje me një proces anëtarësimi të bazuar në meritë dhe me progres demokratik të matshëm në respektim të kritereve të Kopenhagës.
Vetëm duke garantuar drejtësi të vërtetë, zgjedhje konkurruese, institucione funksionale dhe respektim të të drejtave themelore, një vend mund të bëhet një kontributor i vërtetë në BE.
Jam e bindur se ne mund t’i arrijmë këto standard, dhe me mbështetjen tuaj, ne do t’ia dalim!
Faleminderit.
