Deputeti demokrat, Luçiano Boçi ka komentuar në Kuvend, arrestimin e Federica Mogherinit, ish-Përfaqësuese e Lartë e Bashkimit Europian për Punët e Jashtme dhe aktualisht rektore e Kolegjit të Evropës, e njohur po ashtu edhe si mikesha e Edi Ramës.
Boçi u shpreh se është arrestuar një person që për vite me radhë qeveria e ka treguar si shembull suksesi, kur në fakt rezultoi e kundërta.
“Një ndër problemet më të mëdha për qytetarët shqiptarë, krahas problemeve të tjera që dalin, është pikërisht korrupsioni. Dhe në fakt shqetësimi që ngriti zonja Zhupa është shqetësim i drejtë. Nuk është arrestuar thjesht një zyrtare europiane dhe ne të mbyllim sytë dhe veshët. Është arrestuar drejtoresha e kolegjit europian, që ju na e keni tundur si shembull suksesi, megjithëse ky kolegj ka rrëmbyer tokën e kampusit të Universitetit Publik të Tiranës. A ka shqetësim më të madh qytetar sesa ky? ,- u shpreh deputeti.
Boçi akuzoi më tej kryeministrin Rama se po bën rolin e gjyqtarit dhe se është i vetmi kryeministër në Europë që hedh në gjyq sistemin e drejtësisë të cilin vetë e ka nxjerrë nga sqetulla e vet.
“Pastaj shqetësimi tjetër që vjen, sigurisht është drejtësia. Kryeministri shqiptar është i vetmi kryeministër që hedh në gjyq sistemin e drejtësisë që e ka nxjerrë nga sqetulla e vet. Me të cilën, ose me të cilin krenohet, ose krenohej se tash normal, jeni turr të gjithë këtij sistemi të drejtësisë. Dhe ky është shqetësimi bazik i qytetarëve shqiptarë”,- tha ai.
