Aksi Elbasan – Librazhd u shndërrua pasditen e sotme në një makth të vërtetë për qindra drejtues mjetesh, të cilët mbetën të bllokuar për orë të tëra në trafik, si pasojë e punimeve që po bëhen në këtë zonë.
Sipas raportimeve, 16 km rrugë ishte thuajse totalisht e paralizuar, por pavarësisht kaosit të krijuar asnjë patrullë policie nuk është parë në terren për të bërë të mundur lirimin e qarkullimit.
Ndërkohë që radha e automjeteve shtohej, Policia e Elbasanit në një reagim zyrtar njoftonte se ka vendosur 4 gjoba për 3 automjete dhe 1 motomjet, duke shmangur totalisht problemin e trafikut.
Është paradoksale në fakt, se si policia është kaq e shpejtë në vendosjen e gjobave, dhe inekzistente në zgjidhjen e problemeve në terren, si trafiku.
Megjithatë ky është një tjetër rast që tregon se sa larg është policia nga misioni i saj real dhe si po degradon dita ditës një nga strukturat më të rëndësishme për sigurinë e qytetarëve.
