Rreth një e treta e certifikatave spanjolle të eksportit të mishit të derrit janë bllokuar pas shpërthimit të etheve të derrave, e para në tre dekada, njoftoi sot ministri spanjoll i bujqësisë.
“Nga 400 certifikata eksporti në 104 vende, një e treta është bllokuar. Ne po punojmë për t’i hapur ato sa më shpejt të jetë e mundur”, tha Ministri i Bujqësisë Luis Planas, në një konferencë për shtyp.
Virusi, i cili u regjistrua për herë të fundit në Spanjë në vitin 1994, u zbulua në gjashtë derra të egër pranë Barcelonës. Planas tha se eksportet e mishit të derrit të vendit kapin një vlerë prej 8.8 miliardë eurosh, 58% e të cilave shkojnë në Bashkimin Evropian.
Ai tha se eksportet në BE nuk u prekën, përveç atyre brenda një zone prej 20 kilometrash rreth burimit të shpërthimit.
“Puna jonë është t’i mbajmë tregjet ndërkombëtare të hapura”, shtoi ai.
Rajoni verilindor i Spanjës, Katalonja, ka ndaluar hyrjen në një park të madh natyror pasi gjashtë derra të egër të ngordhur pranë Barcelonës rezultuan pozitivë për ethet afrikane të derrave.
