Nënkryetari i Parlamentit, deputeti demokrat Agron Gjekmarkaj, tha sot se ka një keqkuptim në interpretimin publik që i bëhet qasjes së PD-së ndaj SPAK-ut.
Ndërsa theksoi se selia blu e ka mbështetur Drejtësinë në shumë çështje, shtoi se në vende të hapura ka edhe objeksione dhe kundërshti për çështje të caktuara, pasi vetëm në diktatura nuk lejohet mendimi i lirë.
Ligjvënësi opozitar akuzoi qeverinë për skandalet e korrupsionit, duke nënvizuar se rasti i zv/kryeministres Belinda Balluku është më i rëndi, ndaj edhe tani është më e domosdoshme dhe emergjente krijimi i një qeverie teknike.
“Ka një keqkuptim për qasjen e PD-së ndaj SPAK-ut. PD i njeh format shtetërore, vendimet e gjykatave në çdo kohë. Ne i kemi njohur dhe zbatuar këto vendime, sado që ka pasur edhe raste që i kemi kundërshtuar.
Komentohen vendimet e gjykatave dhe jepen objeksionet në çdo kohë, sepse nuk jemi në diktaturë. Ka njerëz në SPAK që e nderojnë punën e tyre dhe institucionin, por ka të tjerë që marrin vendime politike. Ne kemi pasur objeksione për çështje të caktuara ndaj SPAK ashtu sikurse kemi dhënë mbështetje ndaj tyre po për çështje të caktuara”, tha Gjekmarkaj në News 24.
Ai akuzoi mazhorancën për farsën elektorale të 11 majit, teksa Ballukun e cilësoi “bizhu” të radhës në skandalet e korrupsionit të qeverisë. Deputeti këmbënguli për një qeveri teknike.
“Që nesër duhet të krijohet një qeveri teknike, e kemi thënë që nuk mund të ketë zgjedhje të ndershme në Shqipëri dhe ashtu rezultoi. Rasti Balluku është shumë i rëndë, i paprecedentë, por edhe më parë ka pasur raste të tjera që vërtetonin kërkesat e opozitës për qeveri teknike, Balluku është vetëm një bizhu më shumë në këtë qeveri me skandale. Çdo gjë në këtë qeveri duket sikur është në Big Brother dhe vëzhgohet që nga lart, në të gjitha fushat”, u shpreh ai.
