Presidenti rus Vladimir Putin deklaroi se është i gatshëm të hyjë në bisedime “serioze” mbi planin amerikan për paqen në Ukrainë. Pas kthimit nga një vizitë zyrtare në Kirgistan, ai tha për gazetarët se javën e ardhshme në Moskë pritet të mbërrijë delegacioni i SHBA, për të vijuar negociatat që nisën në Gjenevë dhe Abu Dhabi.
Putin theksoi se një armëpushim mund të arrihet vetëm nëse Ukraina tërheq forcat nga rajoni i Donbasit, të cilin Moska e konsideron zonë strategjike.
Ai shtoi se Rusia “nuk ka synim të sulmojë Evropën” dhe se ndërhyrja evropiane në procesin e negociatave nuk është e dëshiruar nga Kremlini.
Presidenti rus mbrojti gjithashtu të dërguarin special amerikan, Steve Witkoff, i cili u përfshi një ditë më parë në një skandal pas publikimit të bisedës së tij me këshilltarin e Putinit, Yuri Ushakov. Sipas Putinit, Witkoff “mbron interesat amerikane”, pavarësisht dyshimeve të ngritura.
Nga ana tjetër, Presidenti ukrainas Volodymyr Zelensky i dërgoi një letër urimi Presidentit amerikan Donald Trump me rastin e Festës së Falënderimeve.
Në mesazh, Zelensky shprehu mirënjohjen për mbështetjen e SHBA dhe tha se populli ukrainas shpreson për rezultate të prekshme nga përpjekjet diplomatike për t’i dhënë fund luftës.
