Zv.kryeministrja e pezulluar Belinda Balluku ka qëndruar rreth 40 minuta në ambientet e Gjykatës së Posaçme kundër Korrupsionit dhe Krimit të Organizuar (GJKKO) gjatë seancës për njohjen me masat e sigurisë ndaj saj dhe dy bashkëpunëtorëve të saj, Gentian Gjyli e Erald Elezi.
Seanca është shtyrë për dy orë, pasi avokatët kanë kërkuar kohë për të njohur aktet e dosjes. Nuk dihet ende nëse Balluku do të paraqitet sërish në GJKKO pas shtyrjes.
Balluku u pezullua nga detyra dy ditë më parë me vendim të GJKKO-së dhe iu ndalua dalja jashtë vendit.
Ajo është marrë zyrtarisht e pandehur prej datës 31 tetor 2025 dhe akuzohet për “shkelje të barazisë në tendera dhe ankande publikë”, në bashkëpunim me vartësit e saj, në procedurën për ndërtimin e Tunelit të Llogarasë me fond limit 180 milionë euro.
SPAK ka ngritur ndaj saj edhe një akuzë të dytë, që lidhet me dyshime për abuzime me tendera në lotin 4 të Unazës së Madhe.
