Zv.kryeministrja Belinda Balluku u pezullua sot nga detyrat publike me vendim të GJKKO-së, ndërsa iu ndalua edhe dalja jashtë shtetit. Ajo ndodhet prej tre orësh në një takim me kryeministrin në godinën e qeverisë, por deri tani nuk ka asnjë reagim zyrtar nga ana e Edi Ramës.
Ndërkohë, në rrjetet sociale kreu i qeverisë ka zgjedhur të mos prekë fare çështjen Balluku. Përkundrazi, ai ka publikuar një seri fotosh nga nxënës shkollash që përgatiten për festat e Nëntorit dhe Ditën e Alfabetit, si pjesë e programit “Art dhe Zeje”.
Në një tjetër postim, Rama promovon hapjen e një godine të re në Durrës, që do të funksionojë si parking me rreth 400 vende, me energji të vetëprodhuar nga dielli, dhe që sipas tij do të ofrojë edhe hapësira sociale dhe kulturore.
Kjo është hera e dytë që një nga vartëset e tij të ngushta përballet me hetime për korrupsion, pas rastit të Arben Ahmetajt. Megjithatë, kryeministri vijon të këmbëngulë se “nuk ndërhyn në drejtësi”, ndërsa përpiqet t’i bindë qytetarët se vendi po ecën përpara përmes “projektesh zhvillimore”.
Belinda Balluku, është marrë zyrtarisht e pandehur, në 31 tetor 2025 dhe akuzohet nga Prokuroria e Posaçme për “shkeljen e barazisë në tendera e ankande publikë” e kryer në bashkëpunim, në procedurën për ndërtimin e Tunelit të Llogarasë, me fond limit 180 milionë euro. Ndërsa sot SPAK ka ngritur edhe një akuzë të re mbi Ballukun për abuzim me tendera për lotin 4 të Unazës së Madhe.
Ndërkohë përveç masave ndaj Ballukut, gjykata ka caktuar masë sigurie edhe për dy vartësit e saj, drejtori i KESH, Erald Elezi dhe kreu i ARRSH-së, Gentian Gjyli, të cilët janë lënë në “arrest shtëpie”.
