Udhëheqësi i Venezuelës, Nicolás Maduro, ka deklaruar se është i gatshëm të zhvillojë bisedime ballë për ballë me përfaqësues të administratës së presidentit Trump, ndërsa presioni amerikan ndaj tij po rritet.
Kjo deklaratë erdhi vetëm pak orë pasi presidenti amerikan Donald Trump tha se nuk e përjashton mundësinë e dërgimit të trupave tokësore në Venezuelë.
Kujtojmë se administrata Trump e ka akuzuar Maduron, i cili u rizgjodh vitin e kaluar në një proces që shumë vende e konsideruan të manipuluar, se është udhëheqës i një karteli droge. Maduro i ka mohuar akuzat dhe ka akuzuar SHBA-të se po përpiqet të nxisë një luftë për të marrë kontrollin e rezervave të naftës së Venezuelës.
Që nga fillimi i mandatit të dytë të Trump-it në janar, SHBA-të kanë shtuar presionin ndaj Maduros, duke dyfishuar shpërblimin për informacion që çon në kapjen e tij në 50 milionë dollarë dhe duke nisur në muajin gusht një operacion kundër narkotikëve që synon anijet që dyshohen se transportojnë drogë nga Venezuela drejt SHBA-ve.
BBC shkruan se më shumë se 80 persona janë vrarë në sulmet amerikane ndaj këtyre mjeteve, kryesisht në Karaibe dhe disa në Paqësor.
Sipas Sekretarit të Luftës të SHBA-ve, Pete Hegseth, qëllimi i “Operacionit Shtiza e Jugut” është të eliminojë “narkoterroristët” nga Hemisfera Perëndimore. Megjithatë, ekspertë ligjorë kanë vënë në dyshim ligjshmërinë e këtyre sulmeve, duke theksuar se SHBA-të nuk kanë ofruar prova se anijet transportonin drogë.
Po ashtu, mbetet i paqartë ndikimi real i këtyre sulmeve në rrjedhën e përgjithshme të drogës, një pjesë e madhe e së cilës kalon përmes kufirit tokësor me Meksikën.
Përmasat e dislokimit ushtarak amerikan, që përfshin edhe aeroplanmbajtësen më të madhe të Marinës, USS Gerald Ford, kanë nxitur spekulime se qëllimi i vërtetë është rrëzimi i Maduros nga pushteti. Trump është pyetur disa herë nga gazetarët për planet e tij dhe ka dhënë përgjigje të ndryshme. Më 3 nëntor, për CBS, ai tha: “Nuk mendoj se po shkojmë në luftë me Venezuelën.”
Por të dielën, kur u pyet nëse përjashton dërgimin e trupave tokësore, u përgjigj: “Jo, nuk e përjashtoj. Nuk përjashtoj asgjë.” Megjithatë, ai shtoi se “do të fliste me Maduron, ndoshta po. Unë flas me të gjithë.”
Po atë ditë, Departamenti i Shtetit njoftoi se synon të shpallë “Cartel de los Soles”, një grup trafikantësh droge që pretendohet të drejtohet nga Maduro, si Organizatë Terroriste e Huaj (FTO). Ky vendim do të hyjë në fuqi më 24 nëntor. Disa e kanë interpretuar këtë vonesë, së bashku me gatishmërinë për bisedime, si një ultimatum amerikan: ose hyni në negociata, ose përballuni me masa edhe më të ashpra.
Etiketa FTO e bën të paligjshme për qytetarët amerikanë të ofrojnë ndihmë apo burime për grupin në fjalë. Sipas Shtëpisë së Bardhë, kjo do të thotë gjithashtu se SHBA-të do të angazhohen për “eliminimin total të pranisë së këtyre organizatave në territorin amerikan dhe të çdo kërcënimi që ato paraqesin për sigurinë kombëtare.”
Disa analistë mendojnë se, ashtu siç administrata Trump ka justifikuar sulmet ndaj anijeve të dyshuara për drogë në Karaibe, mund të përdorë etiketimin FTO për të mbështetur sulme të mundshme ndaj “Cartel de los Soles” në tokën e Venezuelës.
Në disa paraqitje të fundit publike, Maduro i është drejtuar drejtpërdrejt popullit amerikan, madje duke folur dhe kënduar në anglisht. Të hënën, ai tha: “dialog, po, thirrje, po, paqe, po, luftë, jo, kurrë, kurrë luftë” dhe theksoi se ishte i gatshëm të bisedonte “ballë për ballë” me këdo në SHBA “që dëshiron të flasë me Venezuelën”.
Përpjekjet e mëparshme për negociata me qeverinë e Maduros kanë dështuar. Bisedimet mes opozitës venezueliane dhe qeverisë, të ndërmjetësuara nga Norvegjia dhe të mbajtura në Barbados, si dhe një përpjekje e mëhershme e mbështetur nga Vatikani, nuk dhanë rezultat.
Ndërkohë që SHBA-të po rritin presionin, udhëheqësja e opozitës dhe fituesja e Çmimit Nobel për Paqen, María Corina Machado, po përpiqet të bindë ushtrinë venezuelase të braktisë Maduron.
