Nga Basir Çollaku
Rama është hapur një dëshmitar i dosjes “Sinaloa-Hysa”, një ndihmës në aktivitetet e tij në Shqipëri. Një mikpritës kushërinjsh “meksikanë” në zyrë, për të ofruar lehtësirat e agjendës së kartelit “Sinaloa”. Një prej organizatave terroriste, siç e ka emërtuar zyrtarisht administrata Trump, si një ndër më të pasurat e të rrezikshmet në planet, po sipas listës amerikane, ka degëzuar veten në Shqipëri. Duket se shpërthimet e sanksioneve nga USA, nuk kanë kthim pas. Dosja NarcoRama me shembuj të ngjashëm është e tejmbushur. Mesazhet nga DASH, DEA, CIA kanë qenë të forta e publike. Kartelet e drogës kudo të ndodhen, janë në luftë me SHBA. Agjencitë amerikanë dhe Ambasada në Tiranë kanë mbajtur qëndrime të shpeshta duke pohuar se prioriteti numër një i qeverisë së tyre, është lufta kundër trafikut të drogës, pastrimit të parave, Krimit të Organizuar. Dhe bashkëpunojnë me ato qeveri të cilat kanë këtë prioritet.
I shushatur, ndonëse ende gjithëkontrollues i godinës së shpuar gjithandej të pushtetit të arnuar me korrupsion, pastrim parash, tendera, pronë publike e private të vjedhur, kokainë plot e përplot, banda të kollarisura, Edi Rama tenton të gjejë një strehë azili, për pak kohë më tepër në pushtet. Nxjerr si budallenj ca evropianë apo diplomatë të paguar, ti krehin bishtin, e ujëpërpjetë i thonë se je afër për në BE, por e di se na duhet një certifikatë sigurie andej matanë oqeanit. Dhe defteri vonon por nuk harron, mbërrin. Luftar Hysa dhe familjarë të tij dhe biznese të tij, kazino e të tjera janë sanksionuar, duke u përfshirë në listën e zezë të thesarit amerikan. Dhjetëra milionë euro janë hedhur në ndërtim e kazino edhe në Shqipëri. Janë ripërcjellë në SHBA. Krimi vazhdon. Edi Rama ka pohuar publikisht, pasi janë shfaqur fotot e mysafirëve “Sinaloa” duke dalë nga zyra e tij, se ka pritur Luftarin me “kushërinj nga Meksika”, e këshilltarët e McGonigalit, për tu sqaruar ca padijeni burokratike. Meqë KM ynë është xhymert procedurial i thekur. Po bandat e Durrësit, në hetim e në kërkim, të Shkodrës, në hetim e në kërkim, të Elbasanit në hetim e në kërkim, të Vlorës, në hetim e në kërkim, të Fierit, në hetim e në kërkim, a kanë pastruar para të trafikut të drogës, me leje investimesh strategjike, firmosur nga Edi Rama. Sigurisht po. Po Taulant Balla dhe Olsi Rama? Kujtojmë për to kryesisht 10 ditët e fundit kanë marrë vëmendje maksimale në mediet franceze, holandeze, rrjetet evropiane mediatike ku thuhet hapur se:
Olsi Rama është provuar sipas aksesit të tyre në dokumente hetimor, si përdorues i makinës së trafikantëve të drogës së laboratorit të kokainës në Xibrakë 2014, por hetimet 11 vjeçare përfshirë edhe SPAK, e kanë amnistuar
dhe
Taulant Balla, sërish sipas shkresave të konsultuara prej tyre, nga magazina e miliarda mesazheve të sky-enchro, është i kapur në përgjime të shumta duke biseduar me trafikantë të drogës.
Sigurisht dosjet “Çopja” e “Hoxhosmani” Toyota Auris, janë dosje belge, holandeze, gjermane, britanike, në miliarda euro me burim trafik kokaine, e shumë prej këtyre parave të investuara në Shqipëri, në histori sërish strategjike, ku firmëtar do na dalë kryeministri ynë strategjik, me zëvëndësen e tij strategjike, të pandehurën më të re të qeverisë, Belinda Balluku, çuditërsiht ende në detyrë, ende firmëtare në mungesë dhe me porosi, sipas publikimeve të mbledhjes se qeverisë më 12 nëntor.
Nuk mund të harrohet kapitulli “Aruba” konfirmuar nga antimafia italiane e prokurori Nicola Gratteri. Samiti i kokainës në antilet holandeze, me pjesëmarrje të dedikuar të qeverisë shqiptare, udhëtuese me charter dhe bosëve të kokainës. Ora dhuratë 400 mijë euro. Planet e investimeve të ndara në bordin e drogës. Tani me provat, ku gjenden gjurmë financimesh nga Ndrangheta, Sinaloa, Sacra Corona, e organizata të tjera ndërkombëtare të trafikut të drogës, Rama nuk mund të bëjë mësuesin qorr, plakun shurdh, apo kryeministrin budalla, ku i kafshojnë dardhave e kumbulla, të zgjedhurit e tij e prej tij, para e pas kurrizit. Sigurisht ka minsitra e deputetë, bashkiakë e zyrtarë të tij në histori trafiqesh. Emrat janë aty. Anija do të mbushet gjatë mbytjes, nuk do të zbrazet.
Përse shfaqet Rama kudo në këto ngjarje të mëdha?!
Palloshi i Ballukut, apo “sojnikja” e tij K.., i tremburi i Erionit, po mbytet në Titanikun narkotik ndërtuar prej tij, që më kanabizimin e vendit e pandërprerë më pas. Miliardat tendra e koncensione ku del emri nënshkrues Balluku në mungesë e me porosi, kanë edhe adresa pastrimi parash. Ka edhe trafikantë droge përfitues. Ata dinë sekretet e ortakëve qeveritarë Rama-Balluku. Rikthimi komik i Veliajt si bashkiak procedurial, meqë shefi e fali dhe përdori, duke e rikthyer te pemët dekorative jo ato të mbjella, janë pjesë teatrale mashtruese me shpresë të shpëtojmë bashkë, apo të vdesim bashkë. Ai prapë do të bëjë krokodilin, kur Bela të shkojë te vëlla Erioni së shpejti. Por mos e prisni këtë nëntor të panairit të librit “Kurbanin” e Ramës. Panairi tjetër, do të jetë kryekurbani me të cilin shumë palë do të mbarojnë punë. Do lexojmë “Kurban-Titanikun” e mbushur me organizatën “Rilindja” binjake e “ Sinaloa”. E Titaniku, nuk ka shpëtimin si fat..
