Qeveria ka vendosur që pensionistët të përfitojnë një bonus të përkohshëm, në vend të një rritjeje direkte të pensioneve.
Ministri i Financave, Petrit Malaj, në një konferencë të përbashkët për shtyp me Shefen e Misionit të FMN-së, e justifikoi këtë vendim duke thënë se skema e pensioneve është në proces ristrukturimi dhe se bonusi është një zgjidhje e përkohshme deri në ndryshimet strukturore.
“Teksa i bëjmë vlerësime skemës, kemi menduar që të veprohet mbi bazën e bonuseve, që do të shoqërohen dhe me ndryshime strukturore që do i bëhen pensioneve.
Është menduar që e ardhura shtesë që t’i jepet pensionistëve të jetë në linjë me kontributet që kanë pasur. Ata që kanë pasur kontribute më të ulëta, do të marrin më pak se ata që kanë kontribute më shumë.”, tha ai ndër të tjera.
Qeveria ka premtuar edhe vitin e kaluar se do të rikonstruktojë skemën e pensioneve, por deri më sot pensionistët nuk kanë parë rritje të qëndrueshme.
Bonuset, ndryshe nga rritjet reale të pensioneve, nuk përkthehen në të ardhura të qëndrueshme mujore, duke i lënë të moshuarit të pambrojtur përballë inflacionit dhe rritjes së kostos së jetesës.
