Rusia ka paralajmëruar SHBA-në se mund të rifillojë testimet e armëve bërthamore, pasi presidenti amerikan Donald Trump njoftoi planet për të rinisur testet për herë të parë pas më shumë se tre dekadash.
Sipas agjencive ruse të lajmeve, zëdhënësi i Kremlinit, Dmitry Peskov, tha se “shpreson që Trump të jetë informuar saktë në lidhje me testet e fundit ruse, të cilat nuk kishin karakter bërthamor”. Ai shtoi se “Rusia mbetet e gatshme të vazhdojë negociatat për çarmatimin bërthamor me Shtetet e Bashkuara, por deri më tani Trump nuk i është përgjigjur propozimeve të saj”.
Në një postim në platformën e tij Truth Social, Trump njoftoi “fillimin e menjëhershëm të testeve të reja të armëve bërthamore”, duke e justifikuar vendimin me “programet e testimit të vendeve të tjera”.
