Prokurori i Përgjithshëm, Olsian Çela, gjatë fjalës së tij në Kuvend mbi raportin vjetor për vitin 2024, deklaroi se për shkak të vetting-ut, ka qenë vit i vështirë.
Prokurori i Përgjithshëm, Olsian Çela, gjatë prezantimit të raportit vjetor për vitin 2024 në Kuvend, vlerësoi vitin si një periudhë të vështirë për prokuroritë e juridiksionit të përgjithshëm, për shkak të ndikimit të procesit të vetting-ut.
“Viti 2024 ishte një vit me vështirësi jo të pakta për prokuroritë e juridiksionit të përgjithshëm për shkak të vijimit të punës me një numër të ulët të prokurorëve si pasojë e procesit të rivlerësimit kalimtar,” deklaroi Çela.
Në fjalën e tij, Çela nënvizoi nevojën për përmirësime ligjore për të adresuar format e reja të dhunës në internet, duke përmendur konkretisht shpërndarjen e imazheve intime pa pëlqim si një fenomen shqetësues që kërkon reagim të menjëhershëm nga ligjvënësit.
“Është e domosdoshme të ndërhyhet ligjërisht për të ndëshkuar format e reja të dhunës ‘online’, të cilat po prekin gjithnjë e më shumë qytetarët,” tha Çela.
