Një tjetër paraqitje e shkëlqyer nga Medon Berisha, por këtë herë pa shpërblimin e duhur me Leccen.
Mesfushori i Kombëtares shqiptare shënoi dje një gol spektakolar nga goditja e dënimit, por në fund skuadra e tij u mposht 3-2 nga Udinese.
Pas përfundimit të takimit, Berisha nuk fshehu zhgënjimin për rezultatin, por theksoi forcën e grupit dhe frymën pozitive që po mbizotëron në skuadër:
“Rezultati na lë një shije të hidhur. Besuam deri në fund dhe donim të qëndronim në ndeshje deri në minutën e fundit. Përsa i përket golit, në goditjet e dënimit, trajneri më kërkon gjithmonë të marr iniciativën,” – u shpreh ai.
Berisha vlerësoi edhe kontributin e shokëve të ekipit:
“Grupi është i bashkuar. Ata që hynë, si N’Dri dhe Banda, na ndihmuan shumë dhe bënë mirë. Duhet të hyjmë me të njëjtin shpirt luftarak, sepse mund ta përballojmë çdo skuadër nëse luajmë me këtë qëndrim. Duhet të marrim shembull nga pjesa e dytë dhe ajo që treguam aty.”
