Një ngjarje e rëndë me pasojë dy viktima ka ndodhur mëngjesin sotëm (22 tetor) në Manëz të Durrësit, pranë një karburanti.
Pas një konflikti kanë mbetur të vrarë me armë zjarri shtetasit Aranit Kurti 23 vjeç, dhe Flori Paluçi 33 vjeç, të dy banues në Manëz.
Nga veprimet e para hetimore, dyshohet se 33 vjeçari Fori Paluçi është vrarë nga Daniel Pela, 21 vjeç, gjithashtu banues në Manëz, ndërsa Aranit Kurti dyshohet se është qëlluar për vdekje nga Flori Paluçi gjatë konfliktit.
Si nisi konflikti
Ngjarja ka ndodhur rreth orës 01:45, në ambientet e një lokali pranë një karburanti. Sipas burimeve paraprake nga hetimi, gjithçka ka nisur kur njëri prej viktimave, së bashku me një person tjetër, kanë hyrë në lokal dhe i kanë kërkuar kamerierit që t’u përgatiste kafe. Ky i fundit u ka shpjeguar se ekspresi i kafes ishte i fikur, gjë që ka shkaktuar një debat verbal mes tyre.
Situata është përshkallëzuar shpejt, pasi në konflikt është përfshirë edhe një person tjetër që ndodhej në lokal. Më pas ka ndodhur përplasja me armë zjarri.
Kamarieri nuk është as viktimë dhe as i plagosur në konflikt.
Ndërkohë, Policia vijon kontrollet për gjetjen e Daniel Pelës.
“Rreth orës 01:45 të datës 22.10.2025, në Manëz, pranë një karburanti, pas një konflikti dyshohet për motive të dobta, kanë mbetur të vrarë me armë zjarri shtetasit A. K., 23 vjeç, dhe F. P., 33 vjeç, të dy banues në Manëz.
Nga veprimet e para hetimore të kryera nga grupi i posaçëm hetimor, dyshohet se shtetasi F. P. është vrarë me armë zjarri nga shtetasi D. P., 21 vjeç, banues në Manëz, ndërsa shtetasi A. K. dyshohet se është vrarë nga shtetasi F. P.
Shërbimet e Policisë po vijojnë kontrollet intensive për kapjen e shtetasit D. P.”- njofton policia.
Ndërkohë, një grup i posaçëm hetimor, nën drejtimin e Prokurorit, po vijon punën në vendngjarje për zbardhjen e rrethanave, identifikimin e personave të tjerë të përfshirë në këtë ngjarje dhe administrimin e çdo prove, me qëllim dokumentimin e plotë ligjor të rastit.
