SKënderbeu U-19 ka arritur të marrë një rezultat historik ndaj bashkëmoshatarëve anglezë të Aston Vilës. “Ujqërit e Dëborës” kanë barazuar me rezultatin 1-1 në ndeshjen e luajtur në Korçë, e vlefshme për raundin e dytë kualifikuese të Uefa Youth League.
Të dy golat e takimit u shënuan në pjesën e parë. Fillimisht ishin miqtë nga Anglia që shënuan me Wilson në minutën e ’37 të takimit, teksa 4 minuta më parë humbën dhe një penallti, ku portieri Amarildo Dervishaj u kthye në “hero” për Skënderbeun duke pritur 11-metërshin.
Ndërkohë, në minutën e ’40, Skënderbeu gjeti golin e barazimit me anë të Ensar Beqirit, duke rikthyer festën tek tifozeria korçare. Pavarësisht se anglezët ishin dominues, kampionët e Shqipërisë të grup-moshës U-19 arritën të rezistonin deri në fund, duke marrë një rezultat surprizues në Europë.
Sfida e kthimit do të luhet në Angli, më 5 nëntor, aty ku do të vendoset skuadra që kalon në turin tjetër dhe do të përballet me fituesin e çiftit Az Alkmaar-Linocln Red Imps.
Kujtojmë se në raundin e parë, Skënderbeu eliminoi ekipin Inter D’Eskaldes me rezultatin e përgjithshëm 15-0, ku njërën prej takimeve e fitoi me rezultat historik 10 me 0.
