Ministrja e Infrastrukturës dhe Energjisë, Belinda Balluku, ka njoftuar se “Rruga e Kombit” do të jetë e aksesueshme pa pagesë për 24 orë, në prag të protestës që do të zhvillohet nesër, 17 tetor, ora 17:00, në sheshin “Skënderbej”, Tiranë.
Protesta organizohet në mbështetje të ish-udhëheqësve të Ushtrisë Çlirimtare të Kosovës që ndodhen aktualisht në paraburgim në Hagë.
Balluku shkroi në rrjete sociale: “Rruga e Kombit pa pagesë në datë 17 Tetor.”
Një protestë e ngjashme u zhvillua më 14 shtator në Hagë, nga veteranët e UÇK-së.
Ish-krerët e UÇK-së, Hashim Thaçi, Kadri Veseli, Jakup Krasniqi dhe Rexhep Selimi, ndodhen në paraburgim në Hagë dhe përballen me akuza për krime lufte dhe krime kundër njerëzimit, të cilat të katërt i kanë mohuar.
