Presidenti i Republikës duhet të shkarkohet, pasi jo vetëm shkeli dy herë Kushtetutën me dekretin e zgjedhjeve në Tiranë dhe ministren Diella, por edhe me deklarimin e tij të dypunësimit së fundmi.
Për këto shkaqe, partia Demokratike ka dorëzuar në Kuvend dhe kërkesën për shkarkim të Bajram Begajt, duke evidentuar 7 nga shkeljet kryesore, një kërkesë e firmosur nga 38 deputetë të opozitës.
Kështu u shpreh sot në një intervistë për News 24, deputeti i PD, Belind Këlliçi. Ai e cilësoi militant dhe noter të mazhorancës Begajn, që mbështetjen për këto shkelje e gjente te kryeministri Edi Rama.
“Presidenti tregoi se është noter dhe ushtar i mazhorancës dhe jo president. Një person antikushtetues që mori e bëri një dekret antikushtetues. Noter i vendimeve të mazhorancës. Ne si opozitë dhe PD kemi dy vjet e gjysmë që kërkojmë zgjedhjet në Tiranë, por prisnim respektimin e afateve kushtetuese. Kurse ky e shkeli duke bërë dekretimin antikushtetues për Tiranën, zgjedhjet. Madje jo vetëm kaq, por bëri shkeljen e dytë edhe me dekretimin e Diellës. Turpi më i madh dhe ndërmarrje militanteske e këtij individi me shkelje kushtetuese dhe anshmëri politike. Ky duhet të jetë garant i Kushtetutës, mos të tregojë anësi”, tha deputeti.
Ligjvënësi demokrat gjithashtu shpjegoi më tej se kanë gjetur 7 shkelje dhe kanë dorëzuar kërkesën në Kuvend, teksa e cilësoi absure deklaratën e dypunësimit të Begajt.
“Ne kemi renditur 7 shkelje dhe kërkojmë shkarkimin e tij, sepse ka kryer një sërë veprimesh antiligjore, sikurse edhe punësimi i tij i dytë, nuk e kuptoj se si e ka lejuar stafi i tij të deklarojë edhe dypunësimin, shkelje flagrante e Kushtetutës. Ai kurajon dhe mbështetjen e gjen tek kryeministri i vendit, për të s’ka rëndësi ligji, kushtetuta, rregulli, sepse mbështetjen ia jep kryeministri. Atij i shkëlqejnë sytë kur takon kryeministrin Rama”, tha Këlliçi.
Deputeti shpjegoi edhe detajet e kërkesës, ku gjithashtu objekt apo argument do të jetë dhe shkelja e fundit e Begajt, dypunësimi në klinikën private, që s’ia lejon ligji dhe Kushtetuta.
“Kërkesa është dorëzuar sot, firmosur nga 38 deputetë, ndaj kërkojmë shkarkimin e tij, me shkeljet që ka bërë, si dhe lajmi i sotëm absurde, dypunësimi i tij, nuk është normale”, komentoi ligjvënësi demokrat.
