Ministria kineze e Tregtisë ka deklaruar se Kina është e gatshme të “luftojë deri në fund” në përballjen tregtare me Shtetet e Bashkuara, pas kërcënimeve të presidentit amerikan Donald Trump për vendosjen e tarifave shtesë prej 100% mbi mallrat kineze.
Sipas burimeve zyrtare, reagimi i Uashingtonit vjen si kundërpërgjigje ndaj vendimit të Pekinit për të kufizuar eksportet e metaleve të rralla, një komponent kyç në industrinë teknologjike dhe të mbrojtjes.
“Qëndrimi ynë është i qartë dhe i pandryshuar,” theksoi zëdhënësi i ministrisë. “Nëse SHBA zgjedh luftën tregtare, ne jemi të përgatitur të luftojmë deri në fund. Por nëse zgjedhin negociatat, dera jonë mbetet e hapur.”
Ekspertët paralajmërojnë se një luftë e zgjatur tarifore mund të ketë pasoja të rënda për zinxhirët e furnizimit dhe konsumatorët në të dyja vendet.
