Presidenti i SHBA-ve, Donald Trump, dhe Presidenti i Egjiptit, Abdul Fattah al-Sisi, u takuan sot në Sharm el-Sheikh në kuadër të një samiti paqeje, që synon zgjidhjen e konfliktit në Gaza.
Duke folur për mediat pas mbërritjes në Egjipt, Trump u pyet se kur do të nisë faza e dytë e negociatave për një marrëveshje paqeje.
Ai u përgjigj se kjo fazë ka nisur. “Ka nisur faza e dytë. Fazat janë pak të ndërthurura me njëra-tjetrën”, shtoi Trump. Ai theksoi gjithashtu se nevojitet shumë “pastrim” në Gaza, përpara se të ecet përpara.
Nga ana e tij, Presidenti egjiptian Sisi, duke folur përmes një përkthyesi, mirëpriti delegatët në “qytetin e paqes”, duke e cilësuar marrëveshjen e armëpushimit si një “arritje të madhe”.
Ai i tha Trump-it se ai është “i vetmi” që mund të sjellë fundin e luftës në Gaza.
Sisi gjithashtu deklaroi se dëshiron të punojë për kthimin e trupave të pengjeve izraelite që kanë mbetur në Gaza dhe për të siguruar që armëpushimi të qëndrojë në fuqi.
