Partia Demokratike ka paraqitur zyrtarisht në Kuvend një kërkesë për ngritjen e një Komisioni Hetimor Parlamentar, që do të hetojë ligjshmërinë e veprimeve të zyrtarëve shqiptarë në raport me ish-agjentin e lartë të FBI-së, Charles McGonigal.
Në kërkesën e firmosur nga të paktën 35 deputetë të opozitës, PD thekson se:
Sipas aktpadisë së Prokurorisë amerikane, McGonigal ka zhvilluar kontakte të dyshimta me kryeministrin Edi Rama, si dhe me Agron Nezën dhe Dorian Duçkën, ku përmenden përfitime financiare, shkelje të deklarimeve zyrtare dhe ndikim në vendimmarrje publike.
Kërkesa për hetim mbështetet në nenin 77 të Kushtetutës, nenin 25 të Rregullores së Kuvendit dhe ligjin për komisionet hetimore.
Sipas PD, qëllimi i komisionit është të verifikojë veprimet e zyrtarëve shqiptarë në raport me McGonigal, të nxjerrë përgjegjësi institucionale dhe të parandalojë lidhje të fshehta me zyrtarë të huaj në të ardhmen.
PD pretendon se McGonigal ka ndikuar në nisjen e një hetimi penal në SHBA kundër lobistit të Partisë Demokratike, ndërkohë që ka mbajtur kontakte të fshehta me qeverinë shqiptare dhe është përfshirë në interesa biznesi me kompani që më pas kanë përfituar koncesione nafte në Shqipëri.
