Zëvendëskryetari i Këshillit të Sigurisë së Rusisë, Dmitry Medvedev, e paralajmëroi të hënën Presidentin e SHBA-së, Donald Trump, se furnizimi i Ukrainës me raketa lundrimi Tomahawk mund të “përfundojë keq” për të.
Medvedev, i cili shërbeu si president i Rusisë nga viti 2008 deri në vitin 2012, duket se sugjeroi që Rusia mund të japë një përgjigje bërthamore nëse Ukraina merr dhe qëllon raketa me rreze të gjatë veprimi drejt objektivave brenda Rusisë.
“Furnizimi me këto raketa mund të përfundojë keq për të gjithë. Para së gjithash për Trumpin”, shkroi Medvedev në një postim në Telegram pasi presidenti amerikan përsëriti kërcënimin e tij për furnizimin e Ukrainës me raketa Tomahaëk nëse Rusia nuk pranon t’i japë fund luftës.
Zëdhënësi i Kremlinit, Dmitry Peskov, foli për komentet e Medvedevit, duke pretenduar se furnizimi i armëve në Ukrainë rrezikon përshkallëzim të mëtejshëm të situatës, pasi specialistët amerikanë dyshohet se do të duhet të ndihmojnë Ukrainën në sulmin ndaj objektivave në Rusi.
“Kushdo që ka edhe një kuptim bazë të çështjes e di se ekspertët amerikanë do të përfshihen në trajtimin e raketave të tilla”, u tha Peskov gazetarëve.
Të dielën, Trump tha se mund të shqyrtojë dërgimin e raketave Tomahawk në Ukrainë nëse Rusia vazhdon luftën e saj dhe la të kuptohej se do ta paralajmëronte personalisht Presidentin rus Vladimir Putin nëse ai do të bënte hapa për të siguruar armët.
“Tomahawkët janë një hap i ri agresioni”, u tha ai gazetarëve në bordin e Air Force One.
Trump tha se Presidenti ukrainas Volodymyr Zelensky kishte kërkuar raketat me rreze të gjatë veprimi gjatë një telefonate në lidhje me furnizimet me armë një ditë më parë.
Javën e kaluar, Putin paralajmëroi se Rusia do të forconte sistemet e saj të mbrojtjes ajrore nëse SHBA-të lëvizin për të furnizuar Ukrainën me raketa Tomahawk. Ai gjithashtu e përqeshi Zelenskyn si një “mburravec” për kërcënimin e tij për të përdorur armët kundër objektivave brenda Rusisë.
