Ministri i Jashtëm i Rusisë, Sergei Lavrov, deklaroi të hënën se plani i Donald Trump për zgjidhjen e konfliktit izraelito-palestinez është i kufizuar vetëm në Rripin e Gazës dhe nuk jep qartësi të mjaftueshme sa i përket shtetësisë palestineze.
“E kemi vënë re se plani i paqes i Donald Trump i referohet vetëm Gazës. Përmendet krijimi i një shteti palestinez, por në terma shumë të përgjithshëm,” tha Lavrov gjatë një deklarate për gazetarët nga vendet arabe.
Ai shtoi se është e domosdoshme që këto propozime të konkretizohen më tej, veçanërisht për të përcaktuar qartë çfarë do të ndodhë me Bregun Perëndimor.
Kjo është deklarata më e drejtpërdrejtë deri më tani nga Moska, që shpreh hapur skepticizëm për planin e Trump, duke e cilësuar të paqartë dhe të cunguar.
Megjithatë, Lavrov theksoi se Rusia shpreson që marrëveshjet e arritura mes Izraelit dhe Hamasit në kuadër të këtij plani të zbatohen plotësisht.
