Deputetja e Partisë Demokratike, Jorida Tabaku, akuzoi qeverinë për abuzime dhe korrupsion në menaxhimin e fondeve të Bashkimit Europian për bujqësinë, duke ndikuar drejtpërdrejt në fermerët shqiptarë dhe ekonominë rurale.
Në një video të shpërndarë në rrjetet sociale, Tabaku tha se Parlamenti i ka mohuar opozitës të drejtën për të diskutuar mbi fondet IPARD, të cilat sipas saj janë pezulluar prej më shumë se një viti për shkak të mashtrimeve dhe keqpërdorimeve.
“Fondet e IPARD, një program prej 160 milionë eurosh, janë ndalur për shkak të një skeme masive korrupsioni. Mbi 33 milionë euro janë abuzuar përmes një kompanie konsulente që ka ndarë fondet në mënyrë klienteliste,” deklaroi deputetja.
Tabaku theksoi se një në tre tendera jepet pa garë, një në tre me vlerën limit dhe një në tre për të njëjtat kompani. “Është taksa e korrupsionit që paguhet në çdo sektor – nga bujqësia tek koncesionet dhe tenderat publikë,” tha ajo.
Deputetja shtoi se ky sistem po pengon zhvillimin e fshatit dhe i detyron qytetarët të largohen nga vendi. “Kjo taksë korrupsioni po ndalon fondet e BE-së dhe ka njollosur institucionet. Ky sistem duhet ndryshuar që shqiptarët të kenë mundësi të ndërtojnë të ardhmen këtu, jo jashtë vendit,” përfundoi Tabaku.
