Pamjet e publikuara nga agjencitë ndërkombëtare zbulojnë shkallën e shkatërrimit në Qytetin e Gazës, ndërsa mijëra palestinezë, rreth 500,000 që nga e premtja, rikthehen në enklavën veriore, pas javësh të tëra bombardimesh dhe luftimesh të ashpra.
Videot tregojnë lagje të tëra të kthyera në rrënoja, me ndërtesa të shkatërruara, automjete të djegura dhe rrugë të mbushura me mbeturina.
Banorët, shumë prej të cilëve u zhvendosën nga shtëpitë e tyre gjatë operacioneve, po kthehen me ngurrim për të kërkuar të mbijetuar, ose për të parë nëse shtëpitë e tyre janë ende në këmbë.
Shumë prej tyre mbajnë fëmijë të vegjël, ose pak sende që kanë arritur të shpëtojnë.
Sipas agjencisë izraelite përgjegjëse për transportimin e ndihmës humanitare në Gaza, shpërndarja e ndihmës ka rifilluar ndërsa armëpushimi hyn në ditën e dytë. Kamionë që transportojnë ushqime, karburant dhe furnizime mjekësore po kalojnë gradualisht nëpër pikat kufitare, duke synuar të lehtësojnë popullsinë civile që ka pësuar humbje dhe privime të mëdha.
Armëpushimi ka lejuar rikthimin e përkohshëm të aktivitetit humanitar dhe transferimin e të plagosurve në spitale, megjithatë situata në Gaza mbetet dramatike, me komunitetin ndërkombëtar që thekson se rindërtimi do të kërkojë kohë, stabilitet dhe vullnet politik nga të dyja palët.
