Zgjedhjet lokale në Maqedoninë e Veriut zhvillohen në një kontekst shoqëror dhe politik që vazhdon të jetë thellësisht i polarizuar, vlerësoi Zyra e OSBE-ODIHR në raportin paraprak për zgjedhjet lokale. Sipas Misionit të Vëzhgimit të Zgjedhjeve mosbesimi në institucione, perceptimet për përhapjen e korrupsionit dhe tensionet mbi identitetin kombëtar dhe përfaqësimin etnik vazhdojnë të formësojnë mjedisin zgjedhor.
Në zgjedhjet lokale në Maqedoninë e Veriut, që zhvillohen më 19 tetor, garojnë gjithsej 309 kandidatë për 81 poste për kryetar komune. Regjistri i votuesve mbulon afërsisht 1.83 milionë persona me të drejtë vote, nga të cilët 1.72 milion jetojnë në vend.
Sipas të dhënave nga Komisioni Shtetëror i Zgjedhjeve kandidatët janë kryesisht burra 277 (89.6%), ndërsa gra janë vetëm 32 (10.4%). Kandidatja më e moshuar si anëtare e Këshillit të Komunës së Manastirit është 97 vjeç.
Në bllokun maqedonas gara kryesore po zhvillohet midis partisë në pushtet VMRO-DPMNE dhe opozitës së udhëhequr nga LSDM, ndërsa tek blloku politik shqiptar beteja kryesore po zhvillohet midis koalicionit në pushtet VLEN dhe opozitës AKI.
Gashi: Demokracia matet me dinjitetin e garës
Kryeparlamentari Afrim Gashi ka bërë një thirrje për zhvillimin e një gare të drejtë, demokratike dhe dinjitoze.Sipas tij zgjedhjet nuk janë thjesht një formalitet institucional, por një mjet thelbësor për qytetarët që të zgjedhin drejtues me integritet dhe vizion.
“Demokracia nuk matet me fitoren e një individi apo partie, por me dinjitetin e garës. Prandaj, pres me besim që ky proces zgjedhor të jetë një dëshmi e pjekurisë sonë demokratike dhe reflektim i aspiratave tona europiane”, tha kryetari i Parlamentit Afrim Gashi.
Vlerësimi i OSBE-ODIHR
ODIHR theksoi se zgjedhjet po zhvillohen në një kohë debatesh të intensifikuara mbi ndryshimet kushtetuese të nevojshme për përparimin drejt Bashkimit Evropian dhe në kushte pakënaqësie sociale të intensifikuara pas zjarrit tragjiknë një klub nate në Koçan, i cili dëmtoi më tej besimin në institucione.
Misioni i OSBE/ODIHR-it arriti në përfundimin, se media në Maqedoni mbetet e ndarë përgjatë vijave politike dhe etnike, duke vepruar në një treg të kufizuar reklamash dhe me kapacitete të reduktuara profesionale. Televizioni mbetet burimi dominues i informacionit për qytetarët, por ndikimi i mediave online dhe rrjeteve sociale është vazhdimisht në rritje, shpesh pa mbikëqyrje efektive rregullatore.
Pse po dominon fushata negative kundrejt asaj pozitive?
Analisti politik Xhelal Neziri thotë se arsyeja përse mbizotëron e ashtuquajtura fushatë negative është se rivalët politikë nuk ofrojnë alternativa reale dhe të besueshme për zgjedhjet. Mungesa e besimit te votuesit i detyron partitë të përqendrohen te fushata negative. Kjo formë e propagandës negative drejtohet nga motoja “unë jam i keq, por kundërshtari im është edhe më i keq”.
“Pavarësisht përpjekjeve për të prezantuar projekte të bukura dhe zgjidhje efektive për problemet e qytetarëve, është e vështirë t’i bindësh votuesit se ato do të realizohen. Shumica e kandidatëve kanë përvojë politike – gjë që tani i pengon ata të bindin publikun se do t’i mbajnë premtimet e tyre”, shpjegon Neziri.
Politologu Petar Atanasovski thotë se fushata negative është më e pranishme tek partitë politike maqedonase. Akuzat e ndërsjellta për çështje që nuk kanë të bëjnë fare me pushtetin lokal janë dominante në takimet me votuesit.
“Qytetarët, thjesht, janë mësuar me këtë lloj politike dhe për fat të keq, politikanët ua atë u servirin. Jo gjithçka është aq “e zezë” në këtë fushatë zgjedhore, ka kandidatë që po zhvillojnë një fushatë pozitive dhe që i bazojnë premtimet e tyre tek nevojat e qytetarëve në komuna”, vlerson politologu Petar Atanasovski. Këto do të jenë zgjedhjet e teta lokale që nga pavarësia e Maqedonisë së Veriut në vitin 1991./DW
