Mbrëmjen e 5 tetorit, lagjja nr.3 e Sarandës u trondit nga një shpërthim tritoli që i mori jetën 58-vjeçarit Isuf Jaçaj, një emër i njohur në zonë për aktivitetin e tij në sektorin e turizmit.
Viktima ishte babai i Kalus Jaçaj, 31 vjeç, aktualisht i burgosur për “përkrahje të autorit të krimit” në një ngjarje të mëparshme që lidhet me një konflikt për pronën në bregdet.
Në lagjen nr.4 të Sarandës, Ramadan Zoto alias Canaj, 43 vjeç, plagosi me armë zjarri Gëzim Hajdarajn dhe Ernest Lamën nga Kamza.
Pas ngjarjes, policia shpalli në kërkim autorin e dyshuar së bashku me vëllain e tij Erjon Canaj, Artan Muratajn dhe Kalus Jaçaj, të cilët akuzohen për “moskallëzim krimi” dhe “përkrahje të autorit”.
Sipas burimeve për News 24, Kalus Jaçaj strehoi autorin e plagosjes në shtëpinë e tij për ta mbrojtur nga hakmarrja. Më pas, Ramadan Canaj u largua drejt Korçës me synim kalimin në Greqi, por u arrestua nga policia me një pistoletë të gatshme për qitje.
Babai i Kalusit, Isuf Jaçaj, e telefonoi të birin duke i kërkuar të dorëzohej në polici:
“Duhet të dorëzohesh vetë në polici për përkrahjen e autorit të krimit, në të kundërt do të vijë unë të gjej ku je fshehur dhe të dorëzoj në polici me duart e mija…”
Vetëm katër ditë pas ndihmës së dhënë autorit, më 22 korrik, makina e Kalus Jaçajt u hodh në erë me tritol. Kërcënimet ndaj tij ishin të qarta:
“Dorëzo Ramadan Canaj, autorin e plagosjes në të kundërt do të vrasim ty dhe familjarët e tu.”
Më 5 tetor, 800 gram eksploziv u vendosën poshtë makinës së Isuf Jaçajt, duke e lënë të vdekur në vend. Pavarësisht të kaluarës si precedent penal, ai ishte i njohur për punën e tij me turistët në bregdetin e Sarandës.
