Ngjarja e rëndë në ambientet e Gjykatës së Apelit, ku gjyqtari Astrit Kalaja u vra brenda sallës së gjyqit ka tronditur opinionin publik.
Eksperti i kriminalistikës, Fatjon Softa, ka zbërthyer dinamikën e ngjarjes dhe ka ngritur alarmin për mangësitë në sistemin e sigurisë.
Duke folur në A2 CNN, sipas Softës, autori i krimit ka hyrë në sallën e gjyqit me armë në brez, ka pritur shpalljen e vendimit dhe më pas ka qëlluar gjyqtarin në gjoks me tre plumba.
Ai ka plagosur edhe dy persona të tjerë që ishin palë në procesin gjyqësor. Pas aktit, autori është dorëzuar vetë, duke lënë armën te punonjësi i sigurisë. “Kjo tregon se ai ishte koshient për veprimet e tij,” tha Softa.
Eksperti i sigurisë thekson se gjyqtarët duhet të kenë nivele të ndryshme mbrojtjeje, varësisht nga natyra e çështjeve që gjykojnë. “Ata që merren me dosje për krime, prona apo korrupsion janë më të rrezikuar sesa ata që gjykojnë çështje divorci,” tha ai.
Softa vë në pikëpyetje efektivitetin e sistemit aktual të sigurisë, duke theksuar se nuk mjafton vetëm vendosja e një skaneri apo një punonjësi sigurie. Ai kërkon testim të sistemit mbrojtës dhe përmirësim të filtrave për kontrollin e personave që hyjnë në institucionet e drejtësisë.
Sipas Softës, gjyqtarët e SPAK gëzojnë një status të veçantë mbrojtjeje, por ky status mund të përfitohet edhe nga gjyqtarë të tjerë nëse provojnë se janë të kërcënuar.
Ai nënvizon se sistemi duhet të jetë funksional dhe i testuar për të garantuar sigurinë e trupës gjykuese.
“Me armë në brez ka hyrë në sallën e gjykatës dhe kur gjyqtari ka dhënë vendimin ka nxjerrë armën dhe e ka qëlluar në gjoks me 3 plumba. Ka qëlluar edhe dy persona të tjerë, të cilët ishin palë në gjyq. Ka dalë, ka dorëzuar armën te punonjësi i sigurisë dhe është dorëzuar. Kjo tregon se ai ishte koshient”,
“Duhet të ketë filtra për kontrollin e personave dhe unë mendoj se siguria e gjyqtarëve duhet të jetë e klasifikuar. Ata që kanë dosje për krime, për prona dhe për korrupsionin, kanë rrezik më të lartë sesa ata që merren me çështje divorcesh për shembull”.
“Gjyqtarët e SPAK-ut kanë status të veçantë sa i takon mbrojtjes. Këtë status e marrin edhe ata që e kërkojnë nëse janë kërcënuar. Që të kuptohet nëse funksionon apo jo ky sistem mbrojtës, duhet testuar. A është testuar ndonjëherë? Nuk është siguria që të vendosësh një person aty, një skaner dhe të kontrollojë këdo që të hyjë”.- tha Softa.
