Agjencia e Mbikëqyrjes Policore (Rajoni Vlorë–Gjirokastër) ka njoftuar se është pezulluar nga detyra nënkomisari Dhurim Çenko, me funksion Shef i Seksionit për Hetimin e Krimeve në Komisariatin e Përmetit, pas skandalit seksual që tronditi qytetin.
Në qendër të skandalit janë dy efektivë policie, Pajtim Baka dhe Artur Ago, të cilët abuzuan seksualisht me një 16-vjeçare. Njëri prej tyre, Pajtim Baka, ishte njerku i adoleshentes. Për këtë rast, Gjykata e Gjirokastrës ka caktuar masën e sigurisë “burg pa afat” për Bakën, ndërsa Ago është shpallur në kërkim.
Lajmi u publikua në media dy ditë më parë. Ndërkohë, djali i Dhurim Çenkos, kërcënoi gazetarin Pirro Nase, duke mohuar lajmin dhe duke përdor fjalë kërcënuese dhe ofenduese.
Njoftimi i AMP:
Agjencia e Mbikëqyrjes Policore (Rajoni Vlorë – Gjirokastër) ka ekzekutuar urdhërin e Prokurorisë Pranë Gjykatës së Shkallës së Parë të Juridiksionit të Përgjithshëm Gjiroksatër, e cila ka caktuar masën e sigurisë të karakterit ndalues “Pezullim i ushtrimit të një detyre a shërbimi publik” për punonjësin e policisë N/Komisar DH. Ç., me detyrë (në kohën e kryerjes së veprës penale) Shef Seksioni në Seksionin për Hetimin e Krimeve në Volum, në Komisariatin e Policisë Përmet. Ai dyshohet për kryerjen e veprës penale “Shpërdorim i detyrës”.
Ekzekutimi i urdhrit u bë në vijim të hetimeve të thelluara lidhur me procedimin penal të vitit 2025, ku gjatë marrjes së deklarimeve dhe veprimeve të tjera hetimore ka dyshime të arsyeshme për shkelje nga ana e oficerit të Policisë.
