Ministri gjerman i Mbrojtjes, Boris Pistorius, gjatë takimeve me homologë evropianë në Varshavë, i bëri thirrje NATO-s të japë një përgjigje të fortë ndaj provokimeve të përsëritura të Rusisë.
Ai tha se shkeljet e fundit të hapësirës ajrore në disa vende të Bashkimit Evropian tregojnë se Moska po bëhet gjithnjë e më shumë një kërcënim për sigurinë euroatlantike.
“Moska po i vë në provë aleatët e NATO-s me frekuencë dhe intensitet në rritje. Presidenti rus Vladimir Putin po përpiqet qëllimisht të minojë sigurinë evropiane dhe integritetin territorial të kombeve tona”, deklaroi Pistorius.
Edhe ministri i Jashtëm gjerman, Wadephul, paralajmëroi për rritjen e agresionit rus dhe kërkoi veprime konkrete. Sipas tij, incidentet e fundit nuk janë të rastësishme, por pjesë e një modeli që synon hapësirën ajrore, infrastrukturën kritike dhe gatishmërinë mbrojtëse të vendeve europiane.
Javët e fundit, Polonia, Estonia dhe Rumania raportuan hyrje të dronëve dhe avionëve rusë në hapësirën e tyre ajrore, të cilat NATO i cilësoi si provokime të qëllimshme. Në Danimarkë, incidente të ngjashme me dronë sollën mbylljen e përkohshme të disa aeroporteve.
Wadephul bëri thirrje për forcimin e mbrojtjes kundër dronëve, duke kujtuar se javën e kaluar dhjetë shtete, mes tyre edhe Ukraina, diskutuan mbi krijimin e një mburoje të përbashkët mbrojtëse.
