Casandra “Cassie” Ventura ka rrëfyer në një letër frikën se Sean “Diddy” Combs mund të hakmerret ndaj saj, pak ditë para shpalljes së vendimit të dënimit.
Këngëtarja, e cila dëshmoi në gjyq, iu lut gjykatësit Arun Subramanian që të vendosë një dënim që pasqyron “realitetin e provave dhe përvojën time të jetuar si viktimë”, raporton Page Six.
“Kam ende makthe e kujtime vazhdimisht, çdo ditë dhe vazhdoj të marr kujdes psikologjik për të kaluar të shkuarën time”, shkroi ajo duke iu referuar abuzimit që përjetoi gjatë lidhjes 11-vjeçare me reperin.
“Shqetësimi se Sean Combs ose bashkëpunëtorët e tij do të hakmerren ndaj meje dhe familjes sime është realiteti im. Në të vërtetë e kam zhvendosur familjen nga Nju-Jorku dhe po qëndroj sa më private dhe e heshtur që mundem sepse kam frikë që nëse ai lirohet, veprimi i tij i parë do të jetë hakmarrja ndaj meje dhe të tjerëve që rrëfyen abuzimin në gjyq”, tha 39-vjeçarja.
“Pavarësisht përparimit që kam bërë për ta marrë veten nga abuzimi i tij, mbetem e frikësuar për atë që ai është i aftë të bëjë dhe keqdashjen që padyshim ruan ndaj meje që pata guximin të them të vërtetën”, vijon këngëtarja.
Në letër, ajo rikujtoi abuzimin dhe marrëdhëniet “e detyruara” seksuale gjatë lidhjes së tyre që zgjati nga viti 2007-2018.
“Gjatë pothuajse 11 viteve që ishim bashkë, Sean Combs më godiste, grushtonte, shkelte në fytyrë, më shkulte flokët, më hidhte në tokë dhe në mur. Juria pa fotot e mavijosjeve në shpinën time nga goditjet e Combs dhe çarjen e thellë mbi sy që më shkaktoi kur më përplasi në kokën e shtratit.
E gjithë salla pa regjistrime të Combs duke më goditur e rrahur ndërsa përpiqesha t’ia mbathja nga një festë seksi në 2016-ën. Njerëzit e kanë parë këtë video dhjetëra herë, kanë parë trupin tim të hidhet në tokë, duart e mia mbi kokë, e mbledhur në një pozicion fetusi që të mbrohesha nga goditjet e tmerrshme.”
Modelja tha se përdorte drogë për të “vazhduar aktet e tmerrshme seksuale që ai kërkonte dhe për të mirë veten ndaj dhimbjes fizike dhe turbullimit emocional.”
“Teksa avokatët mbrojtës në gjykatë thanë se lidhja ime me Combs ishte e ngjashme me një ‘histori të madhe dashurie moderne’, asgjë s’mund të ishte më larg së vërtetës. Asgjë rreth kësaj historie s’është e mrekullueshme, e madhe apo me dashuri, ishte një dekadë e tmerrshme e jetës sime e njollosur nga abuzimi, dhuna, seksi i detyruar dhe degradimi.”
Ventura përmend edhe vetëvrasjen për shkak të traumës së përjetuar, por ishte “ndërhyrja e familjes” dhe terapia që e ndihmuan të hiqte dorë.
Në fund, letra përmbyllet me kërkesën e saj që vendimi të “konsiderojë jetët e shumta që Sean Combs u ka dhënë fund me abuzimin dhe kontrollin e tij.”
Reperi është shpallur fajtor për dy akuza prostitucioni dhe secila prej tyre parashikon dënim me 10 vjet burg.
Prokurorët thonë se ai duhet patjetër të dënohet me burg dhe rekomandojnë 11 vite, kurse pala mbrojtëse ka kërkuar jo më shumë se 14 muaj. Deri më tani, Diddy ka provuar dy herë të kërkojë lirinë me kusht në këmbim të 50 milionë dollarëve, por i është refuzuar.
Vendimi për dënimin e tij do të jepet të premten, më 3 tetor.
