Policia e Kosovës ka njoftuar për fluturime të dyshuara të dronëve nga territori i Serbisë në pjesën veriore të vendit.
Drejtori i përgjithshëm i Policisë, Gazmend Hoxha, tha se institucionet janë në kontakt të vazhdueshëm me KFOR-in dhe po monitorojnë situatën.
“Kohën e fundit kemi pasur fluturime të dronëve që dyshojmë se po vijnë nga territori i Serbisë në veri të Kosovës. Policia është në kontakt me KFOR-in, jemi duke bërë monitorimin dhe duke parë çfarë mund të bëhet,” u shpreh Hoxha.
Ai shtoi se rreziku ekziston për zonën kufitare, por jo për qytetarët. “Është e rrezikshme për pjesën e kufirit, po për qytetarët tanë jo, sepse ne i mbrojmë ata. Hapësira ajrore është përgjegjësi e KFOR-it, të cilin e kemi njoftuar bashkë me partnerët tanë,” tha drejtori i Policisë.
Ky zhvillim vjen në një periudhë tensioni të shtuar në veri të Kosovës, ku shpeshherë janë raportuar provokime nga Serbia.
