Këshilli Bashkiak i Tiranës ka votuar për shkarkimin e Erion Veliaj. Prefekti i Qarkut Tiranë i ka përcjellë zyrtarisht vendimin Këshillit të Ministrave, i cili pritet ta shqyrtojë dhe formalizojë nesër në mbledhjen e qeverisë.
Vendimi vjen pasi SPAK ka përfunduar hetimet dhe ka dërguar për gjykim në Gjykatën e Posaçme të Shkallës së Parë dosjen penale ndaj Veliajt. Ai përballet me 13 akuza, ndërsa bashkëshortja e tij, Ajola Xoxa, akuzohet për 12 vepra penale.
Sipas SPAK, gjatë hetimeve është provuar se Veliaj dhe Xoxa, në 9 raste të ndryshme, kanë përfituar shuma monetare dhe pasuri të paluajtshme në mënyrë të parregullt nga subjekte tregtare dhe organizata jofitimprurëse. Këto subjekte më pas kanë përfituar leje ndërtimi dhe fonde publike nga Bashkia e Tiranës.
Gjithashtu, SPAK thekson se me nënshkrimin e tij, Veliaj ka miratuar shpërndarjen e fondeve publike drejt OJF-ve të kontrolluara nga bashkëshortja dhe persona të afërt me të. Nga ky mekanizëm, sipas akuzës, të pandehurit kanë përfituar pasuri në vlera të konsiderueshme.
Prokuroria e Posaçme ka ngritur ndaj tyre akuza që lidhen me shpërdorim detyre dhe korrupsion, duke cituar nenin 260 të Kodit Penal për zyrtarët dhe nenin 245 për personat juridikë që kanë dhënë përfitime të parregullta.
