Gjyqi për dosjen “Plumbi i Artë” është shoqëruar ditën e sotme me momente tensioni dhe përplasje të shumta!
Përplasjet Qoli – Tase
Fillimisht pati tensione mes bashkëpunëtorit të drejtësisë, Skerdi Tase, dhe Petrit Qolit, avokat i të pandehurve të tjerë. Gjatë seancës, Qoli e pyeti Tasen nëse ishte ai personi që kishte qëlluar ndaj deputetit Fatmir Xhindi, duke i kujtuar deklaratën e Tases se të gjithë personat që kishte qëlluar ishin në distancë prej 5 metrash, ndërsa Xhindi ishte vrarë nga kjo distancë.
Qoli pyet Tasen: “Mos jeni ju personi që keni qëlluar ndaj deputetin Fatmir Xhindi? Sepse ju keni thënë që të gjithë personat i keni qëlluar kanë qenë në 5m distancë, dhe Xhindi është vrarë nga kaq distancë? A shihni mirë nga sytë afër larg, se unë psh nuk shoh as afër as larg, dhe asnjëherë s’keni qëlluar në shenjë si ka mundësi?”
Gjykata vendosi të mos lejojë Tasen të përgjigjej, duke “mbyllur” diskutimin mbi këtë çështje specifike.
Përplasjet Dumani – Alibej
Pas kësaj, të penduarit e drejtësisë, Nuredin Dumani dhe Erion Alibej, u përfshinë në një përplasje verbale.
Teksa tregonte për avokatët takimin e tij të parë me Nuredin Dumanin, Alibej tregoi detajet që i kishte treguar i pari mbi “masakrën e Bradasheshit”.
“Nuredini nuk më pranoi që vëllai i tij të ishte në ngjarje. Nuk e di, mbase ishte ndonjë hatërmbetje me vëllanë e tij”, tha Alibej, çka solli reagim të menjëhershëm të Dumanit.
“Me leje zonja kryetare”, tha Dumani duke u çuar në këmbë dhe drejtuar gishtin ndaj të penduarit Alibej: “Ky është mashtrim. Duhet të kërkosh falje për këtë!”.
Tensioni u ndërpre nga ndërhyrja e gjykatës, që urdhëroi punonjësit e sigurisë të zhvendosnin Dumanin në një kënd ku kishte më pak kontakt viziv me Alibejn.
Por tensioni i krijuar mes tyre ka kulmuar në çastet e mbylljes së seancës. Sapo trupa gjykuese ka dalë nga salla, Dumani i është afruar fizikisht Alibejt dhe me ton të lartë i ka thënë: “Të degjeneroj! O të … do me më nxjerr mu mashtrues…”.
Situata kaotike ka bërë që të mos dëgjohet përgjigja që Dumani mori nga Alibej, ndërsa është nevojitur ndërhyrja e punonjësve të policisë për të qetësuar gjakrat.
Pasi kanë shmangur konfrontimin fizik, ata kanë nxjerrë nga salla fillimisht Nuredin Dumanin e më pas Erion Alibejn.
