Policia Kombëtare në Málaga ka goditur një bandë kriminale me origjinë shqiptare, e cila kishte planifikuar një seri të re grabitjesh në vila dhe shtëpi luksoze.
Dy të rinj shqiptarë, 21 dhe 23 vjeç, u arrestuan në një bujtinë në qendër të qytetit teksa përgatitnin një tjetër valë grabitjesh në lagje rezidenciale.
Hetimet e para tregojnë se ata ishin pjesë e një grupi ‘me karakter itinerant’, i cili gjatë muajit gusht kishte kryer 11 grabitje me thyerje në shtëpi të banuara në zonat El Candado, Guadalmar dhe Churriana.
Sipas policisë, autorët vepronin gjithmonë në orët e vona të natës, duke kapërcyer muret rrethuese të vilave dhe duke hapur me forcë dritare ose dyer me mjete të posaçme.
Ata mbanin kapuçë për të fshehur fytyrat dhe vepronin në heshtje, duke marrë para dhe bizhuteri pa u përballur me banorët, të cilët zbulonin grabitjen vetëm në mëngjes.
Pas kryerjes së grabitjeve në Málaga, të dyshuarit ishin zhvendosur në bregdetin e Levantes për të ‘ftohur’ situatën, por u rikthyen sërish në qytet për të përgatitur një tjetër seri sulmesh.
Operacioni policor, i koduar ‘Kapaku’, çoi në arrestimin e tyre më 8 shtator dhe me urdhër gjykate, të rinjtë janë dërguar në paraburgim.
Hetimet vijojnë për të zbuluar nëse ka persona të tjerë të përfshirë në këtë rrjet grabitësish.
