Televizioni amerikan ABC ka pezulluar pa afat programin e natës vonë të Jimmy Kimmel, pas komenteve të forta që moderatori bëri për vrasjen e aktivistit konservator Charlie Kirk.
Vendimi erdhi pasi një grup stacionesh të lidhura me rrjetin refuzuan ta transmetonin më tej shfaqjen, duke e cilësuar gjuhën e përdorur nga Kimmel si problematike.
Në episodet e së hënës dhe të martës të “Jimmy Kimmel Live!”, moderatori foli për reagimet që pasuan atentatin ndaj Kirk, duke deklaruar se “shumë në MAGA-land po punojnë fort për të kapitalizuar mbi këtë ngjarje tragjike.” Ky koment ndezi polemika të menjëhershme në publik dhe politikë.
Çfarë ndodhi?
Në monologun e hapjes të së hënës, Kimmel, një kritik i zëshëm i Presidentit të SHBA-së Donald Trump, akuzoi “bandën MAGA” se po përpiqej të “fitonte pikë politike” nga vrasja e Kirk, duke thënë se ata nxituan të fajësonin të majtën para se të dihej shumë për motivet e autorit të sulmit.
MAGA, ose “Make America Great Again” (Ta bëjmë Amerikën sërish të Madhe), është lëvizja politike e së djathtës që përbën bazën e Trump.
“Banda MAGA po përpiqet me dëshpërim ta paraqesë këtë djalë që vrau Charlie Kirk si dikë tjetër përveç njërit prej tyre, dhe po bëjnë gjithçka munden për të përfituar pikë politike nga kjo,” tha Kimmel në emisionin e tij. “Mes tregimit me gisht, kishte edhe pikëllim,” shtoi ai.
Ai vazhdoi të kritikojë reagimin e Trump ndaj të shtënave.
“Kjo nuk është mënyra se si një i rritur vajton vrasjen e dikujt që e quan mik. Kështu vajton një fëmijë katërvjeçar kur i vdes një peshk i artë,” shtoi Kimmel.
Këto komente zemëruan konservatorët dhe shkaktuan reagime nga administrata e Trump.
ABC, që e ka transmetuar emisionin e Kimmel-it që prej vitit 2003, lëvizi shpejt pas paralajmërimit të Nexstar Communications Group, e cila operon 23 filiale të ABC-së. Nexstar bëri të ditur se do të tërhiqte shfaqjen nga transmetimi duke filluar që të mërkurën.
“Komentet e Kimmel mbi vdekjen e Kirk janë ofenduese dhe të pandjeshme, sidomos në një kohë kaq të tensionuar për diskursin politik kombëtar,” tha Andrew Alford, president i divizionit të transmetimeve në Nexstar.
Pas njoftimit, dhjetëra protestues u mblodhën jashtë studios së Kimmel-it në Hollywood, ndërsa moderatori u largua pa bërë komente publike. Ndërkohë, ABC nuk ka dhënë një afat se kur ose nëse emisioni do të rikthehet në ekran.
Jimmy Kimmel është një nga figurat më të njohura të humorit amerikan dhe prej më shumë se dy dekadash ka qenë pjesë e pandarë e televizionit të natës. Megjithatë, komentet e tij shpesh kanë shkaktuar debate politike, sidomos kur kanë prekur figura të kampit konservator.
Ngjarja e fundit pritet të hapë një diskutim të gjerë mbi kufijtë e humorit politik në media dhe përgjegjësinë e moderatorëve në momente të ndjeshme politike.
