Në Itali, nëna e Mark Samson Nors Manlapaz është akuzuar se ndihmoi të birin pas vrasjes së 22-vjeçares Ilaria Sula, duke pastruar gjakun në dhomën e gjumit me lecka dhe detergjent. Ngjarja ndodhi më 26 mars në banesën familjare në Romë.
Sipas Prokurorisë italiane, ajo nuk e denoncoi krimin, por veproi me gjakftohtësi për të zhdukur gjurmët, duke u bërë pjesë e fshehjes së një vrasjeje. Akuza ndaj saj është “bashkëpunim në fshehjen e një kufome”, e rënduar nga qëllimi për të mbuluar një krim të rëndë.
Prokurorja Maria Perna ka kërkuar 2 vite burg, por me pranimin e fajësisë ajo mund të përfitojë dënim me kusht. Seanca gjyqësore për të është caktuar më 10 nëntor.
Ndërkohë, djali i saj, Mark Samson, akuzohet për vrasje me paramendim. Ai dyshohet se e dhunoi dhe e goditi Ilarian me thikë tre herë në qafë pas një konflikti xhelozie. Trupin e viktimës e fshehu në një valixhe dhe e hodhi në një zonë shkëmbore në Capranica Prenestina. Gjyqi i tij do të nisë më 12 nëntor.
