Shkrimtarit të famshëm të librave për fëmijë, Robert Munsch, i është miratuar vdekja me asistencë mjekësore në Kanada.
Autori i 85 librave, të cilat përfshijnë “The Paper Bag Princess” dhe “Love You Forever”, është diagnostikuar me demencë në vitin 2021 dhe gjithashtu vuan nga sëmundja e Parkinsonit.
Për New York Times, 80-vjeçari u shpreh se nuk kishte vendosur ende një datë për vdekjen e tij.
“Do të largohem kur të filloj të kem probleme të vërteta me të folurin dhe komunikuarin. Atëherë do ta di”, zbuloi ai.
Kanadaja e legalizoi për herë të parë eutanazinë në vitin 2016 për njerëzit me sëmundje terminale. Në vitin 2021, ligji u ndryshua për të përfshirë ata me probleme fizike serioze dhe kronike, madje edhe në rrethana jo kërcënuese për jetën.
Në intervistën me revistën New York Times, Munsch tha se vendimi i tij u ndikua nga vdekja e të vëllait nga sëmundja e Lou Gehrig, e njohur edhe si skleroza laterale amiotrofike (ALS), forma më e zakonshme e sëmundjes së neuroneve motorike (MND).
Munsch tha: “Ata e mbajtën gjallë gjatë të gjitha këtyre ndërhyrjeve. Mendova, le të vdesë.”
Në Kanada, personat mbi 18 vjeç duhet të plotësojnë disa kërkesa për të qenë të kualifikuar për vdekje të asistuar. Ato përfshijnë të kesh një “sëmundje serioze dhe të pashërueshme”, të bësh një “kërkesë vullnetare që nuk është rezultat i presionit të jashtëm” dhe të jesh në një “gjendje të avancuar të rënies së pakthyeshme të aftësisë”. Dy mjekë ose infermierë të pavarur duhet ta vlerësojnë pacientin për të konfirmuar që të gjitha kërkesat e përshtatshmërisë janë përmbushur.
Scholastic, botuesi i Munsch, tha në një deklaratë në Instagram se vendimi i tij për të folur publikisht për vdekjen e asistuar “na kujton, edhe një herë, pse puna e Robertit vazhdon të prekë shumë breza”.
Vajza e Munsch, Julie, postoi në Facebook se vendimi i babait të saj për të ndjekur vdekjen me asistencë mjekësore u mor pesë vjet më parë. Julie e quajti intervistën për revistën New York Times “të shkëlqyer”, por shtoi se “askund nuk thuhet se babai im nuk është mirë, as se do të vdesë së shpejti”.
Sipas ligjit kanadez, personi duhet të jetë në gjendje të japë pëlqimin aktiv në ditën e vdekjes së tij.
“Duhet të zgjedh momentin kur ende mund ta kërkoj”, tha ai në intervistë.
Vdekja me asistencë mjekësore përbënte 4.7% të vdekjeve në Kanada në vitin 2023 – statistikat më të fundit zyrtare të qeverisë.
