Pas arrestimit të Shefit të Regjimit të Brendshëm në burgun e Lushnjes, Irekli Leka, janë pezulluar nga detyra drejtori dhe nëndrejtori i burgut, ndërsa punonjësi i përfshirë në ngjarje është përjashtuar nga radhët e Policisë së Burgjeve.
Arrestimi i Lekës u krye pas transmetimit në emisionin investigativ “Stop” të pamjeve ku ai shfaqej duke marrë 700 euro në këmbim të një leje pesëditore për një të burgosur.
Njoftimi i Drejtorisë së Përgjithshme të Burgjeve:
Në vijim të ngjarjes së ndodhur mbrëmjen e djeshme, ku Shefi i Regjimit të Brendshëm në Institucionin e Ekzekutimit të Vendimeve Penale (IEVP) Lushnjë, Irekli Leka, u filmua duke marrë një shumë parash në këmbim të një leje shpërblyese për një të dënuar, Drejtoria e Përgjithshme e Burgjeve ka ndërmarrë menjëherë masa administrative dhe disiplinore.
Me Urdhër të Drejtorit të Përgjithshëm është pezulluar nga detyra drejtori dhe nëndrejtori i institucionit si dhe është përjashtuar nga radhët e Policisë së Burgjeve punonjësi i dyshuar për korrupsion pasiv.
Pas publikimit të pamjeve filmike në emisionin investigativ “Stop”, Drejtoria e Përgjithshme e Burgjeve, në bashkëpunim të ngushtë me Shërbimin e Kontrollit të Brendshëm dhe nën koordinimin e Strukturës së Posaçme Kundër Korrupsionit dhe Krimit të Organizuar (SPAK), ka bërë të mundur arrestimin e punonjësit të dyshuar brenda 30 minutash nga transmetimi i materialit filmik.
Drejtoria e Përgjithshme e Burgjeve falënderon median për angazhimin e saj në zbardhjen e rasteve të abuzimit me detyrën dhe thekson angazhimin e palëkundur për të garantuar integritetin, transparencën dhe zbatimin me përpikëri të ligjit në çdo hallkë të sistemit penitenciar.
LEXO EDHE:
“700 euro për 5 ditë leje”, arrestohet shefi i regjimit në burgun e Lushnjes (Video)
