Opozita ka kërkuar zhvillimin e një debati pa kufizim kohor në Kuvend, lidhur me programin e ri qeverisës.
Gjatë Konferencës së Kryetarëve, Gazment Bardhi theksoi se prezantimi i qeverisë është një moment i rëndësishëm për vendin. Ai kërkoi që çdo deputet të ketë mundësinë të shprehë qëndrimin e tij pa pengesa procedurale. Sipas opozitës, debati duhet të jetë i hapur dhe gjithëpërfshirës.
“Kërkojmë të ketë debat mbi programin qeverisës dhe prezantimin e qeverisë. Është momenti i rëndësishëm dhe secili deputet duhet të ketë mundësinë e debatit”, citohet të ketë thënë Bardhi.
Kërkesa e Bardhit nuk u miratua, pasi në përfundim të mbledhjes, u vendos që koha e debatit do të jetë vetëm 10 minuta për secilin folës.
