Ashtu siç ishte paralajmëruar nga mediat, opozita do të jetë me tre grupe parlamentare në gjatë këtij sesioni parlamentar në Kuvend, ku veç grupit të PD-së, do të jenë edhe grupi i Partisë së Lirisë, si dhe i aleatëve.
Dy grupet e fundit, për të plotësuar kushtin e 7 deputetëve, kanë marrë ligjvënës “borxh” nga grupi i demokratëve.
Kështu, tek grupi i aleatëve do të jenë Fatmir Mediu i Partisë Republikane, Vangjel Dule i PBDNJ-së, Artan Lukun i Partisë Agrare, teksa kanë marrë edhe 4 deputetët e PD-së, Greta Bardeli, Denisa Vata, Zija Ismaili dhe Fidel Kreka. Mesilda Doda e PDIU-së ka refuzuar që të bëhet pjesë e këtij grupi parlamentar për shkak të Vangjel Dules.
Ditën e djeshme u raportua edhe për grupin parlamentar të Partisë së Lirisë, i cili do të përbëhet nga Tedi Blushi, Erisa Xhixho, Edmond Haxhinasto, Brunilda Haxhiu, teksa u janë bashkuar edhe tre deputetët e PD-së, Ina Zhupa, Ledina Alolli dhe Klodiana Çapja.
Ndarja në grupe parlamentare më vete bëhet për shkak të benefiteve që ata përfitojnë, duke nisur nga përfitimet financiare, tek minutazhi që gëzon opozita ne Parlament apo dhe pjesëmarrja në delegacionet jashtë vendit.
