Ushtria izraelite e ka nisur të martën ofensivën tokësore në Qytetin e Gazës, duke u futur dalëngadalë në qytetin më të madh të territorit palestinez, në të cilin janë rrënuar tashmë blloqe të tëra ndërtesash gjatë luftës mes Izraelit dhe Hamasit – grupit të shpallur organizatë terroriste nga Shtetet e Bashkuara dhe Bashkimi Evropian.
Kjo ofensivë shënon një tjetër përshkallëzim të konfliktit që ka trazuar Lindjen e Mesme për gati dy vjet dhe mbase i zbeh edhe më shumë shpresat për arritjen e një armëpushimi. Ushtria izraelite nuk dha afat kohor për ofensivën, e cila sipas saj synon ta “shkatërrojë infrastrukturën ushtarake të Hamasit”, por mediat izraelite raportuan se ajo mund të zgjasë me muaj.
Ajo nisi në ditët kur ekspertë të pavarur nga Këshilli i të Drejtave të Njeriut i OKB-së e akuzuan Izraelin për kryerje të gjenocidit në Gazë. Izraeli e hodhi poshtë këtë akuzë, duke e quajtur raportin e ekspertëve “të shtrembëruar dhe të rremë”.
Palestinezët e zhvendosur largohen nga veriu i Gazës në këmbë dhe me automjete, duke mbajtur me vete gjërat e tyre përgjatë rrugës bregdetare drejt jugut të Gazës, të hënën, më 15 shtator 2025.
Ministri i Mbrojtjes i Izraelit, Israel Katz, deklaroi se “Gaza po digjet” teksa operacioni filloi, ndërsa bombardime të rënda goditën qytetin gjatë natës dhe në mëngjes të sotëm.
Kolona të gjata makinash dhe kamionësh të mbushur me dyshekë e gjësende të tjera u panë përgjatë rrugës bregdetare të Gazës, ndërsa njerëzit largoheshin nga qyteti. Disa hipnin mbi automjete të stërmbushura, ndërsa të tjerët ecnin në këmbë.
Në një vizitë të shkurtër në rajon, sekretari amerikan i Shtetit, Marco Rubio, paralajmëroi se ka një “ka mbetur kohë shumë e shkurtër për t’u arritur ndonjë marrëveshje” për t’i dhënë fund luftës.
Një zyrtar ushtarak izraelit, që foli në kushte anonimiteti në përputhje me rregullat ushtarake, tha se ka nisur “faza kryesore” e operacionit në Qytetin e Gazës. Trupat izraelite po hyjnë në qendër të qytetit nga periferitë, sipas tij.
Paraprakisht, ushtria izraelite e bombardoi tërë natën këtë qytet, duke rrëzuar ndërtesa të larta.
Sipas tij, ushtria izraelite beson se në Qytetin e Gazës kanë mbetur rreth 2.000 deri në 3.000 militantë të Hamasit, si dhe tunele të përdorura nga grupi.
Sekretari amerikan i Shtetit, Marco Rubio (majtas), dhe kryeministri izraelit, Benjamin Netanyahu (djathtas), mbajnë një konferencë të përbashkët për media në Jerusalem, më 15 shtator 2025.
Kapacitetet ushtarake të Hamasit janë dobësuar dukshëm gjatë gati dy vjetëve luftë, dhe sot ky grup kryesisht zhvillon sulme të tipit gueril, me grupe të vogla luftëtarësh që vendosin eksplozivë ose sulmojnë pika ushtarake.
Vlerësohet se rreth 1 milion palestinezë jetonin në rajonin e Qytetit të Gazës para se të niste paralajmërimi për evakuim, ndërsa ushtria izraelite thotë se rreth 350.000 banorë tashmë janë larguar.
OKB të hënën tha se mbi 220.000 palestinezë janë zhvendosur nga veriu i Gazës gjatë muajit të fundit.
Deri në mesditë, Spitali Shifa kishte pranuar trupat e 34 personave të vrarë nga bombardimet, tha Rami Mhanna, një zyrtar i spitalit. Po ashtu, dhjetëra të plagosur ishin sjellë atje.
“Një natë shumë e vështirë në Gazë”, tha për Associated Press Mohamed Abu Selmiya, drejtori i spitalit.
“Bombardimet nuk u ndalën as për një moment”, shtoi ai.
Lufta në Gazë filloi kur militantët e udhëhequr nga Hamasi hynë në jug të Izraelit më 7 tetor 2023, duke vrarë rreth 1.200 njerëz, shumica civilë, dhe duke rrëmbyer 251 të tjerë. Në Gzë po mbahen ende 48 pengje dhe Izraeli beson se 20 prej tyre janë gjallë.
Lufta hakmarrëse i Izraelit ka vrarë mbi 67.000 palestinezë, sipas Ministrisë së Shëndetësisë në Gazë, e cila nuk e ndan numrin e civilëve nga ai i luftëtarëve. Ofensiva ka zhvendosur shumicën e 2 milionë banorëve të Gazës, ka shkaktuar shkatërrime masive dhe uri të madhe./REL
