Sekretari i Shtetit i SHBA-së, Marco Rubio, ka dërguar një paralajmërim të fortë ndaj Hamasit, duke i kërkuar grupit palestinez të arrijë një marrëveshje paqeje me Izraelin brenda një kohe shumë të shkurtër.
Sipas tij, ekziston vetëm një “dritare kohe e kufizuar” për një zgjidhje paqësore. “Hamasi nuk ka më muaj në dispozicion, por vetëm ditë, ndoshta disa javë, për të arritur një marrëveshje,” theksoi Rubio.
Shefi i diplomacisë amerikane nënvizoi mbështetjen e palëkundur të Uashingtonit për Izraelin, duke shtuar se SHBA-të do të preferonin një zgjidhje diplomatike, por një “operacion ushtarak i përqendruar” mund të jetë i domosdoshëm për të neutralizuar Hamasin nëse nuk ka lëvizje nga ana e tij.
Rubio po zhvillon vizitë edhe në Katar, ku po lobon që shteti i Gjirit të vijojë ndërmjetësimin mes palëve, pas sulmeve izraelite ndaj udhëheqësve të Hamasit, të mbledhur javën e kaluar për të diskutuar një propozim paqeje.
