Opozita do të ketë të paktën dy grupe parlamentare në Kuvend, pasi përveç Grupit Parlamentar të PD, një të tillë do të ketë edhe Partia e Lirisë e drejtuar nga Ilir Meta.
Burime për mediat bëjnë me dije se po ashtu, edhe aleatët e PD-së pritet të kenë një grup parlamentar më vete, e sigurisht, për të formuar kushtin e 7 deputetëve, ata pritet t’i marrin “borxh” nga demokratët.
Kështu, deputetëve të Partisë së Lirisë, Tedi Blushi, Erisa Xhixho, Edmond Haxhinasto edhe Brunilda Haxhiu mësohet se do t’u bashkohen edhe tre deputetët e PD-së, Ina Zhupa, Ledina Alolli dhe Klodiana Çapja.
Kreu i këtij grupi parlamentar do të jetë sekretari i PL-së Tedi Blushi, ndërsa nënkryetari Edmond Haxhinasto, zëdhënëse e grupit Erisa Xhixho, ndërsa Brunilda Haxhiu sekretare.
Ndërkohë, ende nuk dihet se cilët do të jenë deputetët e PD-së që do t’u bashkohen aleatëve si Fatmir Mediu i Partisë Republikane, Vangjel Dule i PBDNJ-së, Artan Lukun i Agrares dhe Mesila Doda e PDIU-së, nëse do të konfirmohet edhe ky grup parlamentar, edhe pse mund të ketë përplasjes mes Mesila Dodës dhe Vangjel Dules, të cilët nuk mund të pranojnë për të qenë në të njëjtin grup.
