Autori i dyshuar i masakrës së Shkodrës, Ragip Gila, është larguar nga Shkodra, dhe është izoluar në paraburgimin ‘302’ në Tiranë, ku po mbahet në qeli të veçantë për arsye sigurie.
Gila është vendosur në një qeli të veçuar, për të shmangur çdo incident të mundshëm, duke pasur parasysh rrezikshmërinë e tij dhe krimin e rëndë që ka kryer.
Ngjarja ndodhi mëngjesin e së hënës në një lokal në qendër të Shkodrës. I pajisur me armë zjarri, një pistoletë dhe një armë automatike ‘Scorpion’, si dhe i veshur me jelek antiplumb, Gila ka hyrë në ambientet e lokalit dhe ka hapur zjarr në drejtim të një tavoline ku ndodhej Erogen Brajoviç, një emër i njohur për lidhjet me fisin Bajri.
Si pasojë e të shtënave me breshëri, u vra truproja i Brajoviçit, Liridon Kraja, si dhe shtetasi Armando Pali. Vetë Brajoviç mbeti i plagosur, ndërsa kamerierja 25-vjeçare, Meri Kaceri, u lëndua aksidentalisht gjatë shkëmbimit të zjarrit.
Rakip Gila është person me precedentë penalë. Në 2023, u arrestua për ‘prodhim dhe shitje narkotikësh’, dhe iu gjetën armë dhe sende të tjera që dyshohet se lidhen me aktivitet kriminel. Gjykata e Shkodrës, më 4 mars 2025, e liroi me kusht, detajet tregojnë se ishte nën shërbim provë për 5 vite, me detyrimin që të mos kryente vepra tjera penale dhe të mos posedonte armë.
