Deputeti Ervin Salianji ka vizituar prindërit e Martin Canit, 14-vjeçarit që u vra gati një vit më parë, duke bërë thirrje që institucionet të mbajnë përgjegjësi dhe të ndërmarrin masa për të parandaluar tragjedi të ngjashme.
Përmes një postimi në rrjetin social Facebook, Salianji ndau foto me prindërit e të ndjerit dhe theksoi rëndësinë e kujtesës dhe veprimit.
“Para dyerve të shkollës u shua jeta e Martin Canit! Sot isha pranë prindërve të tij. Shoqëria shqiptare ka plagë dhe traumat e saj, vrasja e 14-vjeçarit pas një konflikti në shkollë ishte një dramë e rëndë që tronditi opinionin dhe trembi çdo familje. Ngjarje të tilla nuk duhet të harrohen kurrë, sepse janë kambanë alarmi për të gjithë ne,” shkruan Salianji.
Ai shton se vizita nuk mjafton dhe kërkon veprime konkrete nga institucionet: ristrukturim të sigurisë në shkolla, praninë e psikologëve dhe punonjësve socialë në çdo institucion arsimor, si dhe programe edukimi që parandalojnë dhunën mes të rinjve.
“Shkolla duhet të jetë vendi ku fëmijët tanë rriten, mësojnë dhe ëndërrojnë të qetë – jo një vend ku rrezikojnë jetën. Kujtimi i Martin Canit duhet të shërbejë si thirrje për veprim, që të mos përsëriten më tragjedi të tilla,” përfundon Salianji.
