Erika Kirk, bashkëshortja e aktivistit konservator Charlie Kirk, mbajti një fjalim emocional disa ditë pas vrasjes së tij gjatë një eventi publik në Utah.
Në një transmetim live nga selia e organizatës “Turning Point USA”, Erika qëndronte pranë karriges bosh të burrit të saj, ku ai zakonisht regjistronte podcast-in. Në lot, ajo falënderoi ekipet mjekësore dhe autoritetet për përpjekjet për ta shpëtuar atë.
“Trashëgimia e tij nuk do të vdesë kurrë. Zëri i tij do të vazhdojë të dëgjohet,” tha ajo.
Erika, e cila ishte në audiencë bashkë me dy fëmijët e tyre të vegjël në momentin e të shtënave, shtoi se Charlie e donte mbi të gjitha familjen, por edhe presidentin Trump dhe zëvendëspresidentin JD Vance, të cilët ndihmuan në kthimin e trupit në Arizona.
“Nëse menduat se misioni i tij ishte i fuqishëm deri tani… nuk keni parë asgjë ende,” tha ajo, duke iu drejtuar autorëve të sulmit.
Charlie Kirk, 31 vjeç, ishte një nga figurat më të njohura të lëvizjes konservatore të re në SHBA. Ai u qëllua për vdekje gjatë një eventi universitar në Orem, Utah, ndërsa fliste për çështje si dhuna me armë dhe të drejtat e komunitetit transgjinor.
Presidenti Trump njoftoi se do t’i japë Medaljen Presidenciale të Lirisë pas vdekjes, duke e cilësuar atë një “kampion të lirisë” dhe “gjigand të brezit të tij”.
Organizata Turning Point USA e përshkroi Kirk-un si një “dëshmor” të kauzës konservatore.
