Personi në foto raportohet nga mediat amerikane se është autori i dyshuar dhe i arrestuar për vrasjen me snajper të aktivistit Charlie Kirk pak ditë më parë.
Sipas “New York Post” ai quhet Tyler Robinson, lindur dhe rritur në Utah. Madje ka pasur edhe postime të ndryshme në rrjetet sociale për të riun si dhe një profil të tij po në rrjetin social, ku ka hedhur foto dhe video të ndryshme.
Aktualisht pritet vetëm konfirmimi nga autoritetet zyrtare që po ndjekin hetimet dhe po marrin në pyetje të dyshuarin, teksa kanë lajmëruar një konferencë për shtyp.
Një detaj me interes nga hetimi, që çoi në identifikim ishte edhe babai i autorit, i cili informoi autoritetet. Ai tha se i biri i rrëfeu se kishte vrarë Kirkun, informon CNN.
Më pas, i ati i tij informoi autoritetet dhe tha se e kishte mbajtur të birin në një vend të sigurt, derisa ai u mor zyrtarisht në paraburgim.
NBC, nga ana e saj, raportoi, duke cituar burime, se i arrestuari është një 22-vjeçar nga Utah, ndërsa një zyrtar i zbatimit të ligjit, i cituar nga Neë York Times, deklaroi se autoritetet nuk po e zbulojnë identitetin e të dyshuarit, pasi janë ende në proces kërkimi për prova dhe ekzekutimi të urdhrave të kërkimit.
Përveç kësaj, u mësua se ai u arrestua në St. George , Utah, pranë Parkut Kombëtar Zion, rreth 400 kilometra në jugperëndim të universitetit ku u vra Kirk, sipas një zyrtari që kërkoi të mos identifikohej.
