Polonia ka raportuar për herë të parë rrëzimin e dronëve rusë mbi territorin e saj, duke shkaktuar tensione të reja në kufirin lindor të NATO-s dhe Bashkimit Evropian.
Kryeministri Donald Tusk njoftoi se një “numër i madh” dronësh u shkatërruan gjatë natës, duke e cilësuar incidentin si zhvillim të paprecedentë. Si pasojë, Polonia mbylli përkohësisht hapësirën ajrore dhe nisi një operacion ushtarak, ku morën pjesë edhe avionë të NATO-s dhe të Holandës. Autoritetet paralajmëruan qytetarët e tre rajoneve kufitare me Ukrainën që të qëndronin në banesa.
Nga ana tjetër, zëvendësministri i Mbrojtjes së Bjellorusisë, Pavel Muravyeika, deklaroi se dronët kishin hyrë aksidentalisht në hapësirën ajrore polake për shkak të bllokimit të sistemeve të navigimit, duke pretenduar se disa prej tyre u rrëzuan nga vetë Bjellorusia. Sipas tij, gjatë natës mes orës 23:00 dhe 04:00, forcat bjelloruse, polake dhe lituane ndanë informacione përmes kanaleve të komunikimit ushtarak.
Presidenti ukrainas Volodymyr Zelensky e cilësoi incidentin si “një hap tjetër përshkallëzimi” nga Rusia. Forcat ajrore të Ukrainës raportuan se sulmi përfshinte 415 dronë, një raketë balistike dhe 42 raketa lundrimi, duke shtuar se tetë prej dronëve kaluan kufirin ukrainas në drejtim të Polonisë.
Megjithëse aeroportet polake janë rihapur dhe operacioni ushtarak ka përfunduar, ngjarja ka rritur shqetësimet për sigurinë rajonale. Rusia, deri më tani, nuk ka dhënë asnjë koment zyrtar.
