Shifrat e reja zyrtare të Shteteve të Bashkuara tregojnë se ekonomia më e madhe e botës ka 911 mijë vende pune më pak në 12 muaj.
Këto shifra tregojnë një ngadalësim të tregut të punës në periudhën e fundit të presidencës së Joe Biden.
Bureau of Labor Statistics (BLS) ka rishikuar shifrat fillestare të punësimit për mars 2024–mars 2025, të cilat kanë shkuar nga 1.8 milionë vende pune në rreth 911 mijë më pak. Mesatarisht, çdo muaj janë regjistruar 75 mijë vende pune më pak.
Një fitore politike për Trump
Rishikimi i dobët i punësimit mund t’i japë një avantazh politik Presidentit Donald Trump, i cili ka argumentuar se politikat e tij të tarifave dhe emigracionit nuk janë shkak i dobësimit të tregut të punës.
Të dhënat mujore të BLS, të ndjekura me kujdes nga investitorët dhe Wall Street, bazohen në sondazhe të përhershme të bizneseve. Ndërsa raporti vjetor i publikuar sot, 9 shtator, përdor të dhëna shumë më të gjera, duke përfshirë taksat e papunësisë nga çdo shtet, të dorëzuara nga punëdhënësit.
Agjencia do të publikojë një vlerësim përfundimtar të rritjes së punësimit në shkurt 2026, pas shqyrtimit të raporteve të tjera nga kompanitë.
Rishikimi më i madh në dekada
Ekonomisti Omair Sharif e quajti këtë rishikim “më të dobëtin që nga viti 2000”, ndërsa Samuel Tombs nga Pantheon Macroeconomics e përshkroi ndryshimin si tejet të madh, duke fajësuar modelin e BLS për llogaritjen e vendeve të reja pune nga kompanitë që sapo filluan ose mbyllën aktivitetin.
Këto shifra vijnë pas një raporti mujor të zymtë javën e kaluar, ku punësimi në SHBA pothuajse ishte ndalur në gusht, me vetëm 22 mijë vende pune të krijuara. Për pasojë, Trump shkarkoi komisioneren e BLS, Erika McEntarfer, duke pretenduar, se të dhënat ishin “manipuluar” kundër tij dhe Partisë Republikane.
Ai ka nominuar EJ Antoni, ekonomist dhe besnik i MAGA-s, për ta zëvendësuar, por ende pret miratimin e Senatit. Përkohësisht, agjencia drejtohet nga një zyrtar veteran.
